森林做東唔驚你茅

猪拉多纳

易帥蜜月期大開派對

今輪英冠開快車，近期頻頻失分嘅般尼茅夫將會作客諾定咸森林。有時一隊波喺低潮期換上新帥後，往往都會有段蜜月期，無論嗰位新帥係咪真係咁有料。森林今個月搵嚟曾執教保頓、但失敗收場嘅費曼領軍，結果近4戰未輸過，更場場入3球或以上，咁鬼死堅，今仗有得受讓，1.65倍讓球主勝同1.67倍大盤都可以玩吓！

（周四凌晨3時45分開賽）

前領隊皮雅斯喺季初曾帶領諾定咸森林取得11場不敗，係威係勢，但點知原來係一場虛火，隊波愈踢愈沉，球會高層惟有喺今個月初怒炒皮雅斯，任命前保頓領隊費曼執教。其實費曼最初帶領保頓都有唔錯成績，可惜球隊步入頹勢後，就無力扭轉局面，終喺上年10月同保頓和平分手。

費曼嚟到森林後，又係好似當初喺保頓咁，領軍4場錄得3勝1和佳績，攻力更係勁到爆，場場都至少入3粒，唔理費曼嘅教波功力係咪真係咁堅，森林依家正處強勢，班球員撻着晒，受讓同入球大冇理由唔捧啩？
般尼茅夫主攻狂失波

落後緊爭升班對手打比郡同米杜士堡嘅般尼茅夫，最大弱點始終係防守較差，最近4場一共失咗7球，即使攻力不俗，都補唔番後面失嘅波喇！般尼茅夫喺主場出戰尚可靠住地利，以攻代守贏波，但作客就冇呢支歌仔唱，少帥艾迪侯域執意要踢進攻足球，搞到隊波一作客就冇前冇後，近4作客輸足3場，今場捧對家穩陣！