亞洲盃終極戰 袋鼠揮低太極虎

猪拉多纳

亞洲盃今日上演決賽，由東道主澳洲出戰南韓。澳洲自06年「脫大入亞」後取得空前成功，除連續兩屆殺入亞洲盃決賽及取得世界盃入場券外，西悉尼流浪者去年爭議性地奪得亞冠盃更令西亞國家震怒，以亞洲足協會長薩爾曼為首嘅一班西亞勢力，正密謀將澳洲逐離亞洲足協，「袋鼠兵團」今次踢亞洲盃隨時有今生、冇來世，樂比相信澳洲喺天時地利人和下可創造歷史，穩陣起見捧1.54倍澳洲冠軍。

(now671台周六下午5:00直播)

當《澳洲新聞網》日前報道亞洲足協會長薩爾曼有關構思時，確實為澳洲球壇帶來極大衝擊，因為西亞勢力喺亞洲足協隻手遮天，亞冠盃賽制去年都可以話變就變，由東亞同西亞區分開角逐，就知西亞國家為保障自己利益可以去到幾盡。
隨時「緣盡」亞洲盃 東道主澳洲實搏盡

老實講，「袋鼠兵團」澳洲確係今屆亞洲盃表現最優秀一隊，雖然佢哋喺分組賽不敵決賽對手南韓，但當時澳洲出咗線，前線三叉戟卡希爾、羅比古斯及馬菲歷基仲擔任後備，領隊普斯迪高路擺明係唔想用盡佢哋。之後普斯迪高路喺晉級過程中亦頻頻畀主將休息，體力充裕前線肯定大把貨交，而且「袋鼠兵」攻擊點夠分散，12個入球由10位球員射入。仲有呀，澳洲戰術變化多，進攻中場盧安高創造力強，另外亦有卡希爾同杜米祖歷高空轟炸，可以話防不勝防。

當然澳洲最大優勢係主場，決賽8萬門票已經沽清，亞洲盃舉行過15屆，當中有6屆由東道主捧盃，由於當中有唔少主辦地點好似香港、新加坡、泰國甚至卡塔爾都欠缺捧盃實力，所以比率其實已算高。
南韓大踢守勢波

「太極虎」雖然以全勝及不失球姿態殺入決賽，但整體表現未發揮最佳水準，對手給予的壓力亦有限，由於南韓防守不俗，兼且決賽踢法會比較保守，唔排除要到加時或互射12碼至分勝負，為穩陣起見捧澳洲「冠軍」。
Data King：南韓喺今屆亞洲盃零失球

‧「太極虎」喺今屆亞洲盃未失過波。

‧南韓今屆5場亞洲盃全部開出「半細全細」。

‧雙方史上32次交手，澳洲取得12勝9和11負。
盤路解碼

近8屆亞洲盃決賽有7場開出「入球細」。
樂比推介：澳洲 （冠軍）