王子翻生吔魚生粥

猪拉多纳

馬體會打吡戰前唔衰得

馬德里體育會今個月先後5度火併皇馬同巴塞兩大班霸，下輪西甲又同「銀河艦隊」踢打吡，可以話惡戰連場，今晚聯賽造訪伊巴算係易啃，3分落袋相信問題唔大。不過新升班嘅伊巴主場表現唔錯，大敗機會應該唔高，一於撐3.15倍「讓球和」，博馬體會僅熟。

（now632台及TVB13周日凌晨1:00直播）

「床單兵團」周中西盃8強主場硬撼巴塞，「王子」費蘭度托利斯開波唔夠1分鐘就入波，但最終都以2:3落敗，出局收場，隊長基比同中場馬里奧蘇亞雷斯仲齊齊領紅添。雖則輸波出局對士氣唔多唔少會有影響，但見到「王子」重拾昔日水準，擁躉同教頭施蒙尼總算有番啲安慰。今晚前線有「王子」同大熟大勇嘅基沙文拍住上，足以摧毀伊巴嘅防線。
伊巴主場硬淨少大敗

不過主場出戰嘅伊巴亦唔係好恰，呢班波級數秤落差馬體會兩班，但勝在球味十足，波到人到。佢哋近期狀態唔差，近4場聯賽2勝1和1負，之前更試過摸和西維爾同維拉利爾兩支前列分子，喺主場鬥華倫西亞亦僅輸0:1。再講吖，伊巴季初造訪馬體會亦僅以1:2敗走，今晚「床單兵團」要大勝頗有難度，捧「讓和」啱數。