講明以「力」取勝袋鼠兵逼死阿聯酋

猪拉多纳

好多嘢都可一不可再，譬如爆冷就係，所以今日亞洲盃4強澳洲對阿聯酋，大家咪旨意阿聯酋再爆多一鑊，呢場波絕對信主得救，澳洲响足智彩讓球盤只係讓一球，梗係博1.82倍上盤。

（now671台周二下午5:00直播）

阿聯酋喺8強互射12碼淘汰日本固然叻仔，問題係呢場勝仗令所有人嘅焦點，完全集中到佢哋身上，志切响自己地頭捧盃嘅澳洲，更加詳細分析咗呢個巨人殺手，得出嘅結論係阿聯酋比較「懶」，決定用體力法打法喺90分鐘入面放乾佢，換言之一開波就會撳住搶。
揚言凍結「懶人」奧馬鴨都拉文

「袋鼠兵團」後衞沙尼貝利講得最白：「我唔相信佢哋有咁嘅速度、體能同我哋玩足90分鐘。」其實澳洲嘅戰術構思，正正係嚟自日本先鬆後緊，畀阿聯酋逼到互射12碼嘅死因，澳洲為咗打入決賽，借鑑前車玩搶錢戰術，阿聯酋今日肯定冇啖好食。

當然，澳洲班人亦唔係盲目樂觀，日本執包袱提醒咗佢哋唔能夠輕敵，連前國腳賀文都走出嚟提醒班後輩，慎防穆巴奧特、奧馬鴨都拉文同阿密特卡利呢個「阿聯酋三叉戟」，沙尼貝利亦拍心口話奧馬鴨都拉文鍾意行行企企，澳洲有計凍結呢件阿聯酋10號仔。樣樣準備足晒，澳洲個上盤應該穩陣，大不了咪小勝一球走盤啫。
亞洲盃賽制

今輪為亞洲盃4強賽事。比賽一場過決勝負，若90分鐘賽和，將加時30分鐘，再和則互射12碼分高下。