重臨福地受讓1球 撐國足劏袋鼠

猪拉多纳

亞洲盃8強大戰全民齊撐

亞洲盃8強大戰你點可以錯過？東道主澳洲今晚火併中國，「讓球」盤讓到成一球梗係要唔過啦！雖然澳洲有隊長積甸拿克復出，但國足喺分組賽大翻身，連贏3場據講有2.5億人次睇過直播，同時全隊商業價值突破10億元人民幣，加上回歸福地布里斯班作戰，全民力撐一於博下盤！

（now671台周四晚6:30直播）

澳洲喺最後一場分組賽以0:1不敵南韓，屈居A組次名出線，其實卡希爾同羅比古斯呢場波都只喺比賽尾段後備落場，今場佢哋打番正選，仲有揭幕戰受傷嘅積甸拿克傷愈復出，「袋鼠兵」戰鬥力點秤都好番啲。不過對佢哋不利嘅係，布里斯班球場草地情況勁唔掂，羅比古斯喺對南韓之戰後慘到話唔知點踢，更大鑊嘅係澳洲今場仲有史柏拉洛域停賽，後防開窿隨時出事。
商業價值突破10億 澳洲傳媒驚輸聲勢

國足喺「福地」布里斯班贏過沙特阿拉伯同烏茲別克，唔似會受草皮惡劣影響，而且當地有20萬至30萬華人，仲有唔少擁躉專程坐飛機趕去布里斯班撐場，加上澳洲人鍾意睇澳網多過足球，班主場Fans隨時走晒去睇澳網，難怪連當地傳媒都擔心，今場國足聲勢分分鐘會勁過主隊。況且日前因傷錯過操練嘅張琳芃冇咩大礙，強陣出擊受讓梗係值得睇高一線。

其實今屆國足爭氣殺到入8強，已經成為國內全民話題，除咗央視新聞聯播罕有狂煲，網上仲有超過10萬網民畀Like喪讚，而且國足喺B組3戰全勝期間，更有2.5億人次睇過直播。專家仲話，開幕前國足同NIKE簽嘅12年10億元人民幣贊助合約，照依家個勢簡直超晒值，相信贏埋呢場更加會財源滾滾，為名為利為人民，國足今晚梗係打甩髀啦！
盤路解碼

中國今屆兩次「讓球」盤全贏。
Data King：近5次交手4場開細

‧兩隊近5次對賽有4次開入球細。

‧澳洲近29年未試過喺正式賽事擊敗中國。

‧澳洲前屆首次參賽8強止步，上屆奪亞。

‧中國以往3次入8強有兩次晉級。