突尼西亞超班圍剿佛得角

猪拉多纳

今日繼續同大家分析非洲國家盃，B組出線大熱突尼西亞會對佛得角，前者向來係非洲傳統勁旅，今次已係第17次亮相決賽周，面對僅第2次殺入決賽周嘅新丁佛得角，淨係講經驗都贏咗成條街，何況「北非鷹」自去年由利堅斯接掌後，除外圍賽保持不敗外，大軍更展現出嚴密組織能力及良好精神面貌，今仗讓平半，樂比推介1.81倍上盤。

（開賽時間：周一凌晨3:00）

突尼西亞由於地理位置接近歐洲，加上係前法國殖民地，所以球風深受法國影響，尤其係防守方面，更加係佢哋看家本領，自利堅斯去年中接手以來，突尼西亞踢咗9場比賽僅失4球，當中外圍賽陷入「死亡之組」，面對埃及同塞內加爾兩大勁旅，仍能取得4勝2和佳績首名出線，可見利堅斯確實有深厚功力，球員喺佢領軍下士氣亦極佳。
主帥有料 入球點多

雖然突尼西亞賽前傳來壞消息，前鋒基利法及賓尤斯夫因傷退隊，好彩呢班波長久以來都唔係靠個別球星孭飛，而係着重整體踢法，從佢哋嘅入球點極為分散，而且經常由後上嘅中場球員好似捷卡奧、卡斯里入波，就知道此言非虛。

綽號「青鯊」嘅佛得角係非洲小島國，人口約50萬，所以長期以來都係非洲魚腩部隊，佢哋能夠進身決賽周全靠抽到靚籤，因為外圍賽對手莫桑比克同尼日爾實力頗弱，事實佛得角外圍賽亦踢得唔算好，6場比賽輸咗2場。值得一提係兩軍曾喺巴西世盃外圍賽時交過手，當時突尼西亞主場作客均能擊敗對手，可見實力始終高一皮，今場一於支持「北非鷹」！
非國盃賽制

現為分組賽階段，16隊分4組，每組4隊進行單循環比賽，每組首名及次名晉級8強。
樂比推介：突尼西亞（上盤）

非國盃B組