錘仔猛扑 老虎變豬頭 韋斯咸係時侯贏番場

猪拉多纳

今晚英超早場有韋斯咸主場對侯城，戲碼雖然唔強，不過一樣好有投X價值，因為今場絕對係近6場不勝嘅「錘仔幫」反彈贏波好時機，「老虎」侯城兩大前鋒謝拉域同艾保靴南迪斯都因傷缺陣，作客惡唔出樣，一於撐「錘仔幫」扑濕呢隻「無牙老虎」，捧主勝！

（now 621周日晚9時30分直播）

侯城今季表現大跌Watt，衰到要護級，全因隊波變咗「無牙老虎」，完全唔識入波，由10月尾對利物浦一仗開始，聯賽踢咗13場，有成9場波係交白卷，攻力勁唔掂，最幣係今場仲要有分別入咗6球同3球嘅前鋒謝拉域同艾保靴南迪斯都唔踢得，作客遇着韋斯咸，等睇呢隻「老虎」畀「錘仔」扑到變「豬頭」！
英足盃晉級士氣振

雖然韋斯咸個勢冇季初咁強勁，不過表現絕對唔失禮，近4場都係先開紀錄嗰隊，可惜最終守唔到尾，今場對住攻力極曳嘅侯城，係時候贏番場！「錘仔幫」上場英足盃雖然同愛華頓踢到12碼階段先淘汰對手出線，體力比侯城輸蝕，不過士氣就一定高過對手多多聲，咁辛苦先至贏波晉級喎，班球員苦盡甘來，今場梗係要趁勢打「老虎」，1.58倍嘅主勝咪嫌熱！