老虎發威o趙袋鼠

猪拉多纳

捱過流感強陣出擊

亞洲盃A組首名爭奪戰喺布里斯班上演，東道主澳洲對南韓讓平半要唔過，首先澳洲得失球差佔優，今場和波都首名戰意未必夠，其次南韓大軍被流感襲擊後，今場可以重排強陣，「老虎」又點會怕「袋鼠」呀？

（now671台周六下午5:00直播）

澳洲喺揭幕戰以4:1反勝科威特後，日前又淨數阿曼4蛋，由於得失球差佔優，就算佢哋想避開B組首名嘅中國，今場都冇必要嘥彈藥搶3分，打和同樣兩戰全勝嘅南韓已經夠做，鬥心上唔係太靠得住。更何況上場因傷避戰嘅隊長積甸拿克，睇個勢都唔似會冒險復出，慳番啖氣8強再搏仲實際。
澳洲和波都掂 讓唔起

雖然澳洲個勢好似好勁，但我始終覺得，佢哋嘅牌面同以往差好遠，巴西世盃3戰全敗出局係最好證明，而且卡希爾已經35歲，唔通場場都靠佢救命咩？對家方面，南韓連續兩場贏1:0，氣勢的確較輸蝕，而且李青龍同金昌洙首戰受傷，表面睇的確唔多抵捧，但大家唔好忘記，今場佢哋有幾件主力復出呀！
孫興民 具滋哲 病完復操勁生猛

近日南韓唔少地方受到流感侵襲，就連佢哋嘅國腳去到澳洲一樣中招，孫興民同具滋哲仲因為咁，錯過南韓對科威特嘅比賽。不過根據南韓攝記嘅最新相片睇到，兩位德甲球星已經復操，而且相當生猛，加上教頭史泰歷克上仗專登收起部分主力，今場排番強陣，病貓有望變番老虎，一於要下盤！