紅軍捉鵝大件事

猪拉多纳

焗用牛油手 防線有隱憂

英超2014壓軸戰，利物浦壓軸出擊，主場對「天鵝」史雲斯。紅軍「無鋒勝有鋒」，備受壓力嘅領隊羅渣士近期破釜沉舟，索性將3個中場史達寧、菲臘比古天奴、拉爾拉拿推前攻堅。呢個「5呎7吋」三叉戟速度快、夠靈活，效果出奇理想，但「牛油手」門將米洛列特重獲正選，始終令人擔心，難擋史雲斯強力射手韋菲特邦尼衝擊。剛柔進攻對決，各有所長，博入球大。

（now 621周二凌晨4時直播）

利物浦今季成績大倒退，好大程度因為蘇亞雷斯離隊、史杜列治又長期養傷，冇咗呢對上季攻入52個英超入球嘅組合，僅用巴洛迪利、列基林拔代替，羅渣士處境可謂巧婦難為無米炊。不過，羅帥已有新橋，改打「無鋒陣」，將3個身高僅5呎7吋嘅中場史達寧、菲臘比古天奴、拉爾拉拿推前，畀佢哋更大自由空間，發揮進攻本領。
史雲斯火力猛

事實證明羅渣士決定正確，3人有技術、有速度，令進攻更多元化，早前陷入入球荒嘅史達寧近3仗轟入3球，包括上仗一箭定江山搞掂般尼，「中鋒」位置非常適合佢。菲臘比古天奴亦好生猛，曾經射破阿仙奴大門。羅渣士已成功解決鋒力問題，但防線有隱憂，近期表現唔錯嘅澳洲門將巴利鍾斯上仗傷出，被迫起用米洛列特把關，呢個比利時國腳今季變咗「牛油手」，經常發波瘟，狀態及信心都處於低谷，今場正選上陣，成為防線計時炸彈。

史雲斯實力唔弱，剛獲得兩連勝，韋菲特邦尼屬於英超高產射手，呢位力量型中鋒埋門把握力強，今季聯賽已有8球進帳，加上基菲爾施古臣後上攻門亦好有威脅，要撕開紅軍防線並唔難。事實上，利物浦同史雲斯近年交手經常上演入球騷，近4次對賽全開大盤，總共出現19個入球，包括上季紅軍主場贏4比3，非常誇張，入球大值得再追。