越南主場重菲撐

猪拉多纳

優質射手黎公榮大勇

東南亞錦標賽A組最後1輪賽事，主辦國之一嘅越南迎戰菲律賓，越南和波都可以出線，但身為東道主，冇理由求和咁衰仔，應會全力爭勝奪首名晉級資格，射手黎公榮大勇，連續兩場有波入，攻力有保證。菲律賓已獲出線權，戰意唔及主隊。越南主W1.65倍熱得有道理，值得一試。

（now670周五晚8時直播）

越南首仗意外被印尼逼和，似乎有點輕敵，其實越南該仗創造唔少入波機會，佔盡優勢，可惜未能好好把握。

不過吸取教訓後，第2場即大炒老撾3蛋，盡顯級數。越南不乏好波之人，黎公榮曾經効力過日乙球隊札幌岡薩多，為越南上陣62次轟入37球，入波率極高，今屆兩場分組賽都有波入。有黎公榮在陣，越南勝算樂觀，今仗讓菲律賓半一，備受莊家睇好。
菲律賓篤定出線未必硬碰

菲律賓兩戰兩勝，攻入8球，表現令人眼前一亮，菲國近年有唔少球員出外搵食，包括効力美職肯薩斯體育會嘅中場史迪奧保，帶挈國家隊水準都有明顯進步。問題係菲律賓已肯定出線，未必會同越南硬碰，以免出現無謂受傷影響爭標，今場揀番主隊穩陣。