東瀛兵夫添捉袋鼠

猪拉多纳

本田圭佑移前攻堅生晒

踢波嘅嘢唔單止講實力，球員作戰心態都好重要，今輪國際賽期除咗歐國外同非國外較具競爭性，其餘都係無關痛癢嘅熱身賽，呢類賽事最難捉摸，畢竟球會先係球員嘅米飯班主，如果踢太公波有乜損傷，就會畀米飯班主詐型。不過鬼Sir對日本堅有信心，今日下晝佢哋喺主場搵咗澳洲「拍跳」，「東瀛武士」挾住大勝餘威可輕取對手。

（有線61及201台周二下午6時20分直播）

呢兩支亞洲球隊同樣喺今夏世盃令人失望，日本之後搵咗墨西哥籍教頭艾古爾接掌帥印，呢位曾喺西甲打滾多年嘅老帥，一改以往常用單箭頭戰術，刻意將「國寶」本田圭佑移前一格，拍住岡崎慎司攻堅，立即收到奇效。

上周喺熱身賽對住洪都拉斯，Honda仔就交出入波兼兩次助攻，協助球隊大勝6比0。儘管只係熱身賽，但由於亞洲盃決賽周將於明年一月開打，力圖衞冕嘅日本必定要把握每次練兵機會進行磨合，鬼Sir認為佢哋今次勁有誠意，好似Honda仔、岡崎慎司、香川真司、內田篤人、吉田麻也、長友佑都等外流球星悉數歸隊，而且「東瀛武士」一向以認真見稱，唔使懷疑佢哋嘅戰意。
澳洲食老本劣績斑斑

貴為亞洲盃東道主，澳洲始終未能解決青黃不接嘅問題，中前場仍要靠卡希爾、比斯安奴等老將支撐大局，睇番「袋鼠兵團」今年踢咗10場波，錄得1勝2和7負嘅劣績，上月作客實力麻麻嘅卡塔爾都輸埋，表現不敢恭維。雖然日本喺上屆亞洲盃決賽踢到加時先戰勝澳洲，但後者已今非昔比，相信「東瀛武士」今仗可輕鬆取勝。

鬼Sir有計 張志德

本港至型足球明星，519入波功臣，現為有線電視台柱級資深講波佬，人稱鬼Sir。鬼Sir睇波有乜獨到見解，毫無保留話晒你知。