健康紅魔 歎私房「西」餐

猪拉多纳

群星逃過FIFA病毒

每逢提起FIFA病毒，唔少豪門領隊都皺晒眉，擔心啲國腳級球員傷住返歸。不過曼聯主帥尹戈爾就放心喇，事關啱啱個國際賽期，所有國腳健健康康返球會報到，陣中唔少十字軍仲喺呢段時間養好傷。今晚曼聯喺英超造訪山楂球場鬥「私房菜」西布朗，要趁機打開作客勝利之門話咁易，捧半一上盤至少收半格。

（now621台周二凌晨3:00直播）
靴里拉 楊格 史摩寧 傷愈候命

「紅魔」陣中國腳唔少，荷蘭孖寶尹佩斯、戴利白蘭特，阿根廷雙星迪馬利亞、馬高斯盧祖，西班牙門將迪基亞同哥倫比亞箭頭法卡奧等等，喺啱啱個國際賽期都「周遊列國」踢波。好在呢班「魔將」全部逃過被FIFA病毒「感染」，今晚都可以擔正搏殺，即使隊長朗尼繼續坐波監，戰鬥力亦夠晒保證。

除咗成功避過FIFA病毒，開咧至今傷兵成籮嘅曼聯，唔少猛將都趁住國際賽期傷愈。其中喺上輪聯賽擊敗愛華頓因傷缺陣嘅安達靴里拉、菲爾鍾斯、基斯史摩寧同艾舒利楊格，都已經重新候命，令之前兵源捉襟見肘嘅尹戈爾，能夠喺今輪排出更強陣容，力爭聯賽作客首場勝仗。
虛火西布朗 入波靠晒比拉希奴

主隊西布朗早前連贏3場，表面睇落氣勢如虹，但除咗對手侯城同般尼並非「硬嘢」外，若非熱刺分心歐霸盃，佢哋偷唔偷到雞都成問題。無疑英格蘭新星比拉希奴踢7場入5球，表現確實幾標青，奈何西布朗今季聯賽僅入8球，入球點過分集中絕非好事，今場佢實被曼聯重點「招呼」，未必咁易搵到食。

更何況西布朗例牌被曼聯食到應一應，英超史上8次主場鬥「紅魔」僅得1和7負，唯一和波更係費爵爺收山戰至「逃過一劫」，今晚都係乖乖地做炮灰吧啦！
盤路解碼

曼聯上季12場讓半一賽事，有8次贏盤及4次輸盤。
乜都玩錦囊：往績贏晒博埋紅魔「半客」

曼聯往績食住西布朗，今場更以強陣出擊，贏波固然值博，不過客W只得1.58略嫌冇肉食。既然主帥尹戈爾力爭英超作客首勝，最近4場聯賽無論贏輸都好，上半場都領先，今場不妨追2.05倍「半客」。
Data King：尹佩斯撞「西」有料到

‧曼聯射手尹佩斯近7次喺英超鬥西布朗，貢獻4個入球及2次助攻。

‧紅魔對上4場英超全開「半贏」。

‧西布朗過往8次英超主場鬥曼聯，僅得1和7負劣績。