東洋魔女撲擊中華台北

猪拉多纳

亞運女足B組最後一輪賽事，上屆金牌得主日本女足對中華台北女足，由於日本隊同中國隊同分，「東洋魔女」今仗勢必盡數對手，爭取更多淨得球，確保以小組首名出線，令進行淘汰賽後較易踢。以日本上仗大炒約旦12蛋嘅霸氣，睇怕中華台北女足無力招架，直取日本女足讓球客勝。

（有線64及203台周一晚7時直播）
為爭首名必全力盡數

日本女足水準喺亞洲超晒班，首輪被中國女足守和後，已預料到最終可能需要同中國計算得失球，決定小組首名誰屬。因此，第二場出全力狂勝約旦12比0，球員每次入波後，都立即執番個波放中圈，希望盡快重新開波，爭取入多幾球，可見佢哋對小組首名資格志在必得。由於中國女足今日同時間會對魚腩約旦，隨時又贏兩位數，日本隊絕對唔可以鬆懈，相信仍然會出真工夫贏到盡。

中華台北女足首仗被約旦逼和2比2，次仗吞中國女足4蛋，有幾多斤両可想而知，相信唔敢奢望喺日本身上取得分數，但求輸少當贏。雙方最近一次交手係上年10月熱身賽，日本大勝8比2，今次屬於爭首名出線關鍵戰，日本肯定更加落力，好可能唔止淨贏6球。