萊茵河打吡科隆細路最可愛

猪拉多纳

本輪德甲壓軸戲上演闊別咗29個月嘅萊茵河打吡，重返德甲嘅科隆主場迎戰慕遜加柏，科隆不但挾上季打破德乙失球最少紀錄而臨，重返德甲經過3輪聯賽後更成為唯一一支未失過波嘅球隊，至今3場全部開細盤，面對近期忙到嘔嘅慕遜加柏相信唔會多波入，科隆呢條「細」路太可愛，值得再追。

（有線61及64台周日晚11時30分直播）

今場係史上第81次萊茵河打吡，對於等咗兩年幾嘅雙方球迷嚟講意義重大，科隆防線喺奧地利「防守大師」史杜加帶領下組織嚴密，門將漢恩同4名後衞默契一流，今晚蓄銳主場迎打吡，戰意加零一，不過面對牌面高一線嘅慕遜加柏唔會盲目搶攻，何況較早前對史特加嘅入球功臣，日本國腳箭頭大迫勇也因傷缺陣，根本冇搶攻本錢。
慕遜加柏疲兵作客唔敢急

慕遜加柏上輪聯賽大戰史浩克，跟住不足三日前歐霸火併維拉利爾，今晚係佢哋8日來第3戰，球員未必回到氣，今晚作客唔會踢得太急進，佢哋對呢場打吡十分肉緊，聲稱會為球迷力戰，適逢今日係球隊年輕體育總監艾比爾嘅41歲生日，教練法夫爾話好希望以贏波作賀禮。

慕遜加柏喺近7次萊茵河打吡對科隆都未輸過，但疲兵作客面對今季不敗兼不失嘅科隆，預期入波唔會多。