車路士試陣火力全開 奧國熱身大開殺戒

猪拉多纳

英超球隊車路士前赴奧地利同當地球隊禾夫斯貝加踢熱身賽，「藍戰士」近期熱身賽頻頻入波，火力非常驚人。咁啱奧地利球隊禾夫斯貝加連續兩場賽事都攻入對手4球，鋒線入球能力似乎都唔錯，兩軍今次交手大有機會上演入球騷，阿謙捧入球大。

（TVB301周四凌晨1時30分直播）
禾夫斯貝加狀態唔曳

車路士今夏收購咗唔少球員，包括西甲馬德里體育會嘅前鋒迪亞高哥斯達同後衞菲臘路爾斯，與及巴塞隆拿前鋒法比加斯，但亦有中堅大衞雷斯及左閘艾殊利高爾離隊，人腳變動其實頗大。不過，車路士近期踢嘅2場熱身賽表現都唔錯，呢2場波合共入咗8球，足見「藍戰士」前線火力驚人，今仗只係面對奧地利球隊禾夫斯貝加，有力攻破對手大門。

奧地利球隊禾夫斯貝加已經踢咗兩場正式賽事，分別係奧地利盃同奧甲，呢兩場波都輕鬆擊敗對手而且每場仲入咗4球咁多，可見球隊已經完全上晒力，今仗就算面對英超勁旅車路士都唔會死守照樣進攻，阿謙睇好呢場熱身賽入波唔會少，捧入球大。
錘仔強「細」揼鳳凰

另一支英超兵韋斯咸遠赴新西蘭同澳職球隊威靈頓鳳凰「拍跳」， 「錘仔幫」現時狀態只屬初起階段，加上有唔少新球員加入，默契要重新「夾過」。

至於，威靈頓鳳凰因為澳職仲未開咧，只係踢咗1場熱身賽，狀態亦唔慌好得去邊，兩軍各有不足下今仗入波唔會多，撐細盤好路。

（周三下午3時30分馬會網上文字直播）