撐德國今晚打老虎

猪拉多纳

查找上仗不足 即諗辦法補鑊

世盃抖咗兩晚又再開火，8強戰今晚先演兩場，頭場法國大戰德國，德軍16強對阿爾及利亞踢出表現最差一仗，唔使出局都要多謝門神紐亞，相反法國一直順風順水，賽前連德軍經理比亞荷夫都話：「睇兩隊走勢，法國入4強嘅呼聲比德國更高！」不過黑柴就偏要同佢拗頸，堅信德國經過上仗涉險過關必然會嚇番醒，面對未受過考驗嘅年輕法國，可以憑更強卡士同經驗，一於「今晚打老虎」，德國讓平半撐上盤。

（無綫翡翠及明珠台、TVB 13及19、now 818及840周六凌晨零時直播）
調整防線加快進攻

寫呢篇預告之前，黑柴啱啱同前輩Peter黃興桂食晏，話題當然離唔開今晚兩場大戰，我哋意見一致：打波係一場還一場！雖然法國同哥倫比亞到目前為止嘅表現比德國同巴西更搶鏡，但係今屆世盃每隊都各有優點同缺點，而德國同巴西嘅缺點提早暴露，反而令佢哋有時間補救，喺實力咁接近同咁講求體力化嘅現代足球，好難要求一支球隊喺一個月內7場波都咁醒，上屆冠軍西班牙都輸過畀瑞士，相信德巴兩支傳統勁旅仍然擁有頂級球隊氣質，足以擊退經驗不足嘅法國同哥倫比亞，我同Peter都相信德國、巴西將喺準決賽會師。

德軍上仗防線畀阿爾及利亞反擊打到失魂，除低估對手將防線壓得太上外，後防定海神針曉姆斯臨場發燒缺陣亦係一大關鍵，代替佢嘅梅斯達菲未夠級數，領隊勒夫固執排陣亦將多位主力球員放喺唔適合嘅位置，此役後德國問題暴露無遺，勒夫賽後遭各方質疑，黑柴認為大家都睇到嘅問題，以精於計算嘅德軍教練團點會睇唔到，返去查找不足後，今仗防線肯定會作出調整。進攻方面，上仗後備入替嘅舒賀爾尼今仗會擔正，將有助加快進攻速度同效率，今場硬仗有力大變身。
法國未受真正考驗

法國4場波入咗10球數據華麗，但其實未受考驗，尤其頭兩場，遇弱旅洪都拉斯係靠完半場前一個12碼加對手紅牌套餐至贏得輕鬆，次仗對瑞士更加行運，對手主力中堅雲貝根開波6分鐘就傷出，搞到瑞士要用佐羅同辛德路斯兩個計時炸彈扼守中路，結果兩人輪流送禮造就法國大勝，之後對厄瓜多爾同尼日利亞，已經見到法國進攻嘅板斧同把握能力都唔係咁強，球隊今屆以年輕球員為骨幹，大賽前列貝利受傷更令佢哋失去領袖，經驗不足，級數尚待證明，黑柴認為佢哋好難闖過德國呢一關，即使德國小讓平半，上盤仍然值得支持。
畢坦拿 FIFA器重經驗稍遜

國籍：阿根廷　

年齡：39

曾執法大賽：13世少盃

簡介：畢坦拿做過足球員同籃球員，正職係中學體育教師，2010年先至做國際球證，短短幾年內極速上位，成為南美名哨。不過大型賽事只係舊年吹過世少盃，跟住就選佢吹今屆世盃，事實上，佢亦獲得國際足協器重，分組賽編咗3場波畀佢執法，包括俄羅斯1比1和南韓、美國2比2和葡萄牙，同埋瑞士3比0贏洪都拉斯，今場法德大戰可以話係佢球證生涯最有分量嘅一場波。

執法場數：42

黃牌數：197

平均黃牌數：4.69

紅牌數：9

平均紅牌數：0.21

判12碼：0.17

平均判12碼次數：0.18
兩遇世盃4強德國贏晒

每逢大賽都被視為熱門強隊，論往績，法國以11勝6和8負稍為秤先，不過德國歷來共攻入對手42球，比法軍多1球，可見雙方差距不大。兩軍雖然歷來有過25次嘅對碰，但係原來未試過喺歐洲國家盃相遇，相反喺世盃歷史上，法德就總共3次狹路相逢。包括82年西班牙同86年墨西哥決賽周，前西德連續兩屆喺4強戰淘汰法國。至於雙方對上一次碰頭係去年2月嘅熱身賽，法國雖然由華布拿先開紀錄，但其後湯馬士梅拿同基迪拉嘅入波助德國反勝2比1，取得近6次對碰嘅唯一一次勝仗。
法國

主要後備：15沙格拿(後衞)、21哥斯尼(後衞)、18穆沙施素高(中場)、11基沙文(前鋒)、20雷米(前鋒)

入球球員分布：賓施馬(3球)、基奧特、馬度迪、華布拿、穆沙施素高、保羅普巴(1球)、烏龍球(2球)

入球時間分布：1-15分鐘(0)、16-30分鐘(2)、31-45分鐘(2)、46-60分鐘(1)、61-75分鐘(3)、76-90分鐘(2)

黃牌在身：艾拉、保羅普巴、馬度迪
德國

主要後備：2哥斯基奧斯(後衞)、4賀維迪斯(後衞)、23基拉馬(中場)、19馬里奧葛斯(前鋒)、11高路斯(前鋒)

入球球員分布：湯馬士梅拿(4球)、曉姆斯、馬里奧葛斯、高路斯、舒賀爾尼、奧斯爾(1球)

入球時間分布：1-15分鐘(1)、16-30分鐘(0)、31-45分鐘(2)、46-60分鐘(2)、61-75分鐘(1)、76-90分鐘(1)加時(2)

黃牌在身：賀維迪斯、拿姆
蘇斯黑柴推介：德國 上盤