好少連續兩期冇W 莫雷拉呢鋪有料到

猪拉多纳

　　韋達被即時停賽三個賽馬日，呢次剩低莫雷拉及潘頓兩個鬥法，隔晚二人在騎師王賠率曾經一樣，都係2.85倍，賠率算係幾好分，起碼唔係賣到不足兩倍，總算仲有肉食。

　　講番上期賽事，無端端蔡明紹一日四W，表現反常，成世仔最叻呢日，亦因為佢忽然神勇，好多場賽果搞到「立立亂」，當日潘頓算係表現穩定，執兩W三P，但雷神就冇咁好彩，全日埋單口糠糠。

　　查過雷神近幾個月成績，佢好少連續兩期賽事冇馬贏，對「雷粉」講即係餓你唔親，飽你唔死，好定唔好，見仁見智，但有得贏，總好過冇，至少望見家鄉。

　　金銀花熱得合理

　　呢晚佢跑七匹馬，最熱係「金銀花」，其他隻隻好好分，至少有9倍或以上。頭場隻熱得合理，上次用湯佬搏失，擺個雷神上去，梗係想補中。其他坐騎裏，「信眼光」及「黃金宅男」都係上次佢手上熱倒，仍然繼續效力，冇理由甘心再丟架。

　　Jack