洪都拉斯要贏4球 瑞士急需3分

猪拉多纳

爭出線先決條件大炒對手

E組瑞士同洪都拉斯呢場生死戰，雙方先唔好理厄瓜多爾對法國最終有冇失分，首要條件係做好自己本分攞晒3分，同埋要大炒對手攞得失球優勢先有價講。不過睇番兩隊防線唔多掂，與其防守不如放開懷抱去進攻，1.72倍入球大抵玩！

（TVB1、now801台周四凌晨4:00直播）
梳頓沙基利騷哥利證身價

瑞士首戰雖後上反勝厄瓜多爾，但上場表現走晒樣，畀法國大炒2:5，兩場表現真係差天共地！慘敗唔緊要，最麻煩係正選中堅雲貝根不幸畀法國射手基奧特踢爆面，面骨骨折今場唔出得，領隊希斯菲特被迫要用唔多穩陣嘅辛德路斯頂替。瑞士防線成日走甩人，今場仲要整個「計時炸彈」喺度，睇嚟希帥賽前最好啪定「驚風散」！

更重要係「好波之人」梳頓沙基利，喺呢兩場表現毫無建樹，被外界批評孭唔到飛，士哥攞唔到之餘，仲要陣中4個入波都唔關佢事，先會累到瑞士搞到好似依家咁，出線都要望天打卦，等厄瓜多爾輸波先有希望。呢位「瑞士美斯」本人梗係唔高興啦，所以呢場一定會交足功課令批評者收聲先得。

大家唔善忘嘅話，上屆世盃決賽周分組賽，瑞士最後一場又係鬥洪都拉斯，當時前者只要贏波就可以出線，點知最後又係和波收場，將出線席位拱手相讓畀智利，經過上屆教訓，相信瑞士班球員嚟緊一定會醒醒定定，以免重蹈覆徹。
柏拉西奧斯復出埋下炸彈

不過，佢哋對手洪都拉斯條後防亦唔好得去邊，兩場失5球一樣咁曳。就算今仗有防守中場柏拉西奧斯坐完波監復任正選，但唔好忘記，洪都拉斯首仗輸畀法國，就係多得柏拉西奧斯輸個12碼畀對手之餘，仲要自己攞埋紅牌出場。換句話講，呢位効力史篤城嘅中場都係一個「計時炸彈」！洪都拉斯依家喺小組「包艇」，出線除咗要厄瓜多爾輸波外，自己仲要至少要4球大炒瑞士。既然兩隊都要喪攻，又撞正條防線唔穩陣，與其估邊隊贏，倒不如玩入球大仲實際。
第3場分組賽未贏過

洪都拉斯近10場比賽，取得2勝3和5負成績。

對瑞士歷史上只有1次對賽，結果為0:0。

近2場成功傳球率只有71%。

只曾2次打入世界盃分組賽（1982及2010年），當中第3場分組賽成績為1和1負。
35次射門列強排第3

瑞士近10場比賽，取得6勝2和2負成績。

近2場分組賽共35次射門，喺32強之中排第3。

近2場平均成功傳球率達81%，32強中列第4名。

最近3次打入世界盃分組賽（1994、2006及2010年）嘅第3場分組賽成績為1勝1和1負。
瑞士「洪」心壯志撐上盤

瑞士今場要贏波，一定會全力進攻，洪都拉斯條防線咁曳，今晚成場有排驚。瑞士今場讓1/1.5球，2.05倍嘅上盤抵玩！