阿根廷大炒好伊時

猪拉多纳

三叉戟齊出圍插波斯鐵騎

F組大熱門球隊阿根廷將喺貝洛奧里藏特迎戰亞洲球隊伊朗，「潘柏斯雄鷹」上仗贏波斯尼亞似難實易，尤其係球隊下半場踢回最擅長嘅433陣式後表現更脫胎換骨，今仗肯定會繼續用此戰術。「波斯鐵騎」伊朗首仗力拒尼日利亞來犯表現惹人好感，但面對阿根廷強大火力未必頂得住，加上突然傳出主帥奎羅斯不與伊朗足協續約，對球隊士氣難免有所打擊，今仗相信難擋阿根廷嘅進襲，「潘柏斯雄鷹」有望大勝一仗提早出線，讓球主客和讓兩球都照捧讓球主勝。

（TVB13及19、now 818及840周日凌晨零時直播）

阿根廷分組賽首仗對波斯尼亞時，上半場踢532陣式表現平平無奇，但下半場踢回最擅長嘅433陣式後，表現即時大有改善，主將美斯更打破8年世界盃入球荒，助「潘柏斯雄鷹」旗開得勝。

阿根廷主帥沙貝拉賽後亦公開承認自己早段排532陣式係錯誤，更豪言以後嘅賽事都會沿用433陣式，効力意甲拿玻里嘅射手希古恩將會重返正選陣容，令球迷引頸以待嘅阿根廷「三叉戟」終於登場，面對弱旅伊朗相信會以大量入球證明呢個組合係最適合「潘柏斯雄鷹」嘅。而且阿根廷喺世界盃對亞洲球隊亦有明顯優勢，之前曾擊敗南韓（1986及2010年）及日本（1998年），今仗面對實力平平嘅伊朗，贏波相信毫無難度。

伊朗上仗雖摸和「超霸鷹」尼日利亞，球隊畀人感覺防守不錯但攻擊略嫌欠缺火候，明顯係一支識守唔識攻嘅球隊。
奎帥唔教打擊伊朗士氣

伊朗近日更傳出不利消息，由於當地足協經費有限，合約期即將屆滿的葡萄牙籍主帥奎羅斯表示不會續約，在世界盃完結後就會離隊，此消息對正在打仗嘅「波斯鐵騎」一眾戰將始終有影響，球員喺患得患失嘅情況下面對養精蓄銳嘅阿根廷「三叉戟」，勢必成為「炮灰」，讓球主客和讓到兩球都冇有怕，照捧讓球主勝。
希古恩餓波博先發入波

另外，阿根廷前鋒希古恩久休復出相信非常「餓波」，今仗一定會好積極，希望成功爭取入球，特別項目先發事件「入球」有2.28倍可以一試。
MARK實佢：阿根廷中場 馬斯真蘭奴

馬斯真蘭奴喺巴塞隆拿經常被安排出任中堅致表現不穩，但返到國家隊踢回最擅長嘅防守中場位置即時回復水準。如果阿根廷鋒線被對手重重圍困，馬斯真蘭奴嘅後上攻門將起到關鍵作用。
MARK實佢：伊朗指揮官 尼古納姆

今仗上陣將會第142次代表國家隊出賽嘅尼古納姆，係伊朗國家隊中場嘅指揮官，主宰球隊攻守嘅命脈。曾喺西甲打滾多年嘅尼古納姆，今仗嘅終極目標就係阻止阿根廷取得入球。
往績一戰和波 阿軍世盃食住亞洲兵

雙方於1977年喺中立場馬德里舉行嘅熱身賽交過手，最終各一言和。不過阿根廷喺以往世盃分組賽，曾經對住南韓及日本，佢哋三場贏晒轟入八球，包括上屆憑住希古恩大演帽子戲法，以4比1大勝南韓，睇嚟阿根廷於世盃食住亞洲球隊喎。
請比比食紅牌就係佢

馬斯克 Milorad Mazic

國籍：塞爾維亞　

年齡：41

曾執法大賽：歐霸盃

簡介：馬斯克資歷較淺，大部分時間執法塞爾維亞國內賽事，亦有份主吹今屆世界盃外圍賽，以及歐霸盃賽事。馬斯克今屆曾於德國以4比0大勝葡萄牙執法，除咗派咗一面黃牌外，仲直接出示紅牌，將頭撼湯馬士梅拿嘅葡軍中堅比比趕出場。

執法場數：62

黃牌數：273

紅牌數：17

判12碼：18

平均黃牌：4.40

平均紅牌數：0.27

平均判12碼次數：0.29