荷蘭英雄反轉澳洲

猪拉多纳

君子報仇，4年未晚！荷蘭喺上屆南非世盃決賽輸咗畀西班牙，上仗分組賽再遇仇家，憑「超人」尹佩斯同「閃電俠」洛賓齊齊爆發，最終以5:1「屠牛」，乜仇都報晒！氣勢如虹嘅荷蘭，今晚對住B組墊底大熱澳洲，相信班「英雄同盟」又係時候「做嘢」，就算讓到1.5/2球，都要開個上盤加個大，嚟「拯救」蒼生！

（無綫翡翠台、明珠台、TVB13及now818台、中央5台周四凌晨0:00直播）
睇晒32強 橙軍最有冠軍相

經過首輪分組賽後，相信好多人都認為，荷蘭應該係咁多組入面，表現最Sharp醒又最具冠軍相嘅勁旅。由於B組次名好可能要硬撼巴西，為咗盡早鎖定出線資格、力爭首名，今晚一定會當澳洲係西班牙咁砌。

查實早喺世盃決賽周開始前，好多人都話荷蘭條防線太後生、鋒線又老化，所以好可能會喺分組賽畢業喎，但從第一場波所見，呢隊老嫩合一嘅歐洲勁旅，反而比上屆更具侵略性，「閃電俠」洛賓延續喺拜仁嘅「托弗」狀態，頻頻喺邊線發難，玩到西班牙班守將一戙都冇，配合「離開」莫耶斯後得到「重生」嘅超人尹佩斯，淨係呢兩位「橙軍」英雄，已經可以摧毀任何防線。上場「鬥牛軍」唔好彩，今晚就輪到澳洲有排受喇。
「袋鼠軍團」 仲係卡希爾孭飛

「袋鼠軍團」喺首場分組賽以1:3大敗予智利，攻不銳時守不穩，全場錄得14次「浪射」，所以咪入得1球咁大把囉！到咗今時今日，澳洲前線仲係靠卡希爾一個，上仗對智利都出晒醜，今晚對住荷蘭，想輸少粒都難啦！小妹預期呢場波澳洲會輸到大大鑊，強捧1.57倍入球大、同埋1.87倍嘅上盤啦！
澳洲決賽周10戰4人被逐

澳洲近2屆世盃決賽周6場分組賽，錄得2勝2和2負成績。

踢過11場決賽周賽事，錄得2勝3和6負，總共攻入9球，失17球。

曾3次打入決賽周，只有06年躋身16強，其餘喺分組賽畢業。

澳洲過去10場決賽周賽事入面，曾4次有球員被逐。
荷蘭6戰分組賽5勝

荷蘭近2屆世盃決賽周6場分組賽，豪取5勝1和。

踢過43場決賽周賽事，錄得23勝10和10負，總共攻入76球，失45球。

近5次打入決賽周，未試過喺分組賽出局。

連續2屆世盃分組賽都只係僅失1球。
荷蘭乜都贏晒吼半大

荷蘭第一場就已經展現出強大火力，大炒衞冕冠軍西班牙，認真犀利。今場對住實力可能係決賽周32強中最弱嘅澳洲，荷蘭士氣同質素都贏晒，應該可以一開波就控制賽事，甚至乎喺換邊前已出現大比數戰果，2.25倍嘅半場大吼得過。