王子登基踢到識飛 加納精兵剷平美國

猪拉多纳

美國打籃球勁係人都知，但講到踢波就真係差好遠喇，踢嚟踢去淨係喺中北美洲先惡得出樣，睇佢哋玩過7屆世盃，最叻都只係02年入到8強就知啦！今屆美國仲要抽咗入G組，對住德國、葡萄牙同加納，想出線難過登天。上屆美國喺16強就係畀加納淘汰，聽朝兩隊就會喺首場分組賽碰頭，冇咗當路雲嘅美國想報仇？難啲囉！讓球平手梗係捧有「王子」孭飛嘅加納啦！

（TVB13及now818台、中央5台周二早上6:00直播）
美國冇當路雲齋靠丹普西

話之你係三朝元老、美國足球史上入波最多嘅巨星當路雲，無啦啦都竟然得唔到領隊「金色轟炸機」奇連士文嘅歡心，未能入選世盃大軍。鋒線冇咗呢位洛杉磯銀河隊長，唔單止令美國嘅入球能力弱上加弱，仲搞到隊波嘅星光愈嚟愈暗淡，就連西雅圖海灣者嘅丹普西，都已經係最Top嘅星，點搞呀？

最慘係所謂嘅孭飛球星丹普西，無論體力同腳法都已經無復當年勇，喺英超再無立足之地，要回流美職先搵到食，今場對住加納想靠佢一個人孭起條鋒線？孭鑊就可能易啲囉！
加納當打得艾辛年過30

對面嘅加納出晒名係非洲惡爺，佢哋近3屆世盃決賽周都可以喺小組賽突圍，上屆喺南非世盃仲殺到入8強，全場壓住烏拉圭嚟攻，如果唔係「咬人蘇」蘇亞雷斯嗰下「世紀撲救」，用手將個必入波救出，加納早就可能已經歷史性躋身4強啦！

喺呢4年時間入面，加納班後生仔已經步入黃金高峰期，蒙達利同阿休已經變成AC同馬賽嘅當家巨星，「王子」奇雲保定（Prince）由AC轉戰德甲後，仲直情孭起成隊史浩克添，有佢「登基」擔起成條中場線，今屆世盃，分分鐘係呢位27歲球星嘅表演舞台！

最得人驚嘅係，加納成隊波只係得艾辛一個年過30，其餘球員全部都係年輕當打，有睇呢幾日嘅分組賽嘅球迷，都知體力化踢法喺巴西世盃先係最可靠嘅，我深信加納可以贏到波，平手盤抵玩到震！
Data King：加納決賽周9戰4勝

‧加納曾2次打入世盃決賽周，最佳成績為8強，連續兩屆進身淘汰賽。

‧踢過9場決賽周賽事，錄得4勝2和3負，總共攻入9球，失10球。

‧近2屆世盃決賽周6場分組賽，錄得3勝1和2負成績。

‧今屆世盃外圍賽非洲區D組攻入18球，係小組入球王。
Data King：美國中北美洲士哥王

‧美國曾9次打入世盃決賽周，1930年奪得季軍。

‧踢過29場決賽周賽事，錄得7勝5和17負，總共攻入32球，失56球

‧近2屆世盃決賽周6場分組賽，錄得1勝3和2負。

‧今屆世盃外圍賽中北美洲及加勒比海區第四輪分組入15球，成小組之冠。
乜都玩錦囊：博熱血丹普西先領黃

美國嘅丹普西雖然已經年紀唔細，但依然好熱血，成日都助攻助守。呢場波美國領隊奇連士文應該會派佢打「9號半」，有機會墜後啲嚟踢，以佢打法隨時有可能拎黃牌，丹普西個特別項目第一件事拎黃牌有9.5倍，博得過。