奇兵智利捉袋鼠

猪拉多纳

美洲雙雄 齊發威！

Hi，大家好！今日終於到我Yennie出場喇！喺今屆世界盃我會化身「估波妹」，喺《東網》同《太陽波經》同大家見面，各位一定要多多支持呀！

個個都話今屆巴西世盃B組係「死亡之組」，因為呢組有衞冕嘅西班牙、上屆亞軍荷蘭、「袋鼠軍團」澳洲同「南美紅魔」智利。今晚B組4隊登場，尾場嘅智利鬥澳洲絕對值得一睇，因為智利係我心目中今屆嘅一路奇兵，話晒係南美洲球隊，有半個主場之利，今晚對住近年水準急跌嘅澳洲，就算要讓一球上盤都冇有怕。（TVB13、now818、中央5台周六早上6:00直播）
維達爾復操或披甲

雖然智利唔會有本事攞冠軍，但起碼我覺得佢哋有力喺B組突圍，一來佢哋係南美洲球隊，二來佢哋喺外圍賽以第3名出線，過程中贏過烏拉圭，作客哥倫比亞亦和到，實力有番咁上下。雖然中場主力維達爾近排受傷患困擾，不過佢周三已經復操，尋日仲玩網式足球，右膝傷患應該好番晒！
二線澳洲知衰搶先到埗適應

智利勝在三線實力平均，陣中亦有唔少球員喺歐洲大球會搵食，好似加利美度、伊斯拿，仲有巴塞嘅阿歷斯山齊士坐鎮，佢今季喺西甲射入19球，喺射手榜排第4。大家記唔記得佢喺西甲煞科戰，對馬體會時射入嗰球靚波呀，就知佢有幾勁啦！

至於「袋鼠軍團」澳洲係今屆第一支抵達巴西嘅球隊，領隊普斯迪高路希望班球員，可以有多啲時間適應當地環境同天氣，唔通係有自知之明？雖然佢哋連續3屆打入決賽周，聽起上嚟好似好堅咁，但近幾年嘅表現愈嚟愈曳。青黃不接係佢哋最大問題，依家孭飛嗰班，有好多連名都未聽過，大部分只係喺荷甲、蘇超呢啲次級聯賽，或者德乙搵食，實力麻麻兼冇大賽經驗，喺死亡B組好蝕啦！論實力、人腳同近況，澳洲同智利都差成幾條街，就算受讓一球都制唔過，信「估波妹」捧智利上盤！
Data King：外圍賽入波僅次阿根廷

‧智利喺98、10年世盃決賽周6場分組賽，取得2勝3和1負成績。

‧踢咗29場決賽周賽事，共得9勝6和14負，總共轟入34球，失45球。

‧對上2次打入決賽周，同樣喺16強階段止步。

‧智利喺今屆南美洲區世盃外圍賽16戰轟入29球，只係少過榜首阿根廷。
決賽周10仗贏得2次

‧澳洲最近2屆決賽周6場分組賽，勝負和各得2場。

‧參加過10場決賽周賽事，取得2勝3和5負。

‧曾經3次打入世盃決賽周，只有06年躋身16強，其餘喺分組賽提早畢業。

‧過去10場決賽周賽事中，曾4次有球員被逐。
乜都玩錦囊：智利大啖o趙魚腩

澳洲可以話係今屆賽事最大舊嘅「魚腩」之一，睇佢哋近8場有6場贏唔到就知咩事啦！智利火力一向強橫，近8戰有6場都最少攻入對手2粒，對住「袋鼠兵」唔難輕鬆入番幾球。不過要提防澳洲前線仲有經驗老將卡希爾，隨時反咬番一啖，2.05倍大就弗晒啦！