大摩出舊橋爭盃

猪拉多纳

　　踏入2014年以來，級際賽跑咗超過20場，嚟到今日嘅本地三級賽精英盃，就係今季最後一項上演嘅級際賽。一講到盃賽，又點可以唔提大摩，盃王喎，梗係要優先睇實佢啲馬啦。

　　不過，唔講可能唔多覺，近期大摩馬房經常在盃賽場合搏失，再唔似之前咁，橫掃各大大小小盃賽，對上6項盃賽裏，原來全部冇佢份，方東兩廐各捧兩盃，另外兩盃由蘇保羅及高伯新攞咗，大摩最近一次捧盃已經係17/5亞視盃嘞。

　　今期呢個馬房又一次大排場，精英盃得嗰10匹馬跑，佢派出4匹馬圍剿對手，分別係「恩格斯」、「駿馬名駒」、「風花雪月」及「卡達聖」，邊隻係主力，抑或各為其主，只有大摩至知。

　　駿馬名駒風花雪月對碰W

　　如果睇近績，唔使問阿貴，梗係一手執住嗰對上場串Q馬「駿馬名駒」和「風花雪月」，上次呢對馬喺亞視盃構成馬房Q，呢次轉嚟跑1400米，都係呢兩匹馬耍家路程，有時橋唔怕舊，最緊要受，大摩重施故技，合情又合理，一於買對碰W及鴛鴦Q。(Jack)