普渡馗有兩大任務

猪拉多纳

　　明晚安排兩組五班賽事，先是頭場1650米，再來第二場1200米，低班場合多是亂局，向來惹人生厭，皆因各駒海軍鬥水兵，賽前揀馬無從入手，落注乃是膽搏膽行為，贏輸都可以毫無理據。不過今次兩場五班賽事，揀馬尚且有迹可尋，賭博士認為值得一博。

　　先講頭場「寶樹嘉盈」，上仗跑第三也不獲加分，反映評磅員極度看扁，馬兒現評22分，萬一今鋪再名落孫山，勢將插穿廿分水平，即時跌入淘汰區域。

　　換言之，今次幕後派遣「寶樹嘉盈」出賽，是抱着只許成功決心，排12檔也無阻戰意，這類必搏甩髀之馬，賭博士最為欣賞，值得落注支持。

　　其次再睇第二場，鄭廐「生生發」與李廐「普渡馗」俱不足廿分，但講到鬥志，明顯是後駒較為鮮明。眾所周知，李易達只得10W在手，現況岌岌可危，換言之「普渡馗」今仗身負兩項任務，一是打救自己，二是打救馬房，可謂任重而道遠。事實上，剛戰牠跑獲第五，負於頭馬不過兩乘許，久沉馬已露一絲曙光，田泰安肯再作馮婦，我會細W大P捧場。

　　（XX士）