比利時讓主有森有力

猪拉多纳

贊奴沙要踢爭氣波

人哋唔畀面，咪自己爭氣囉！曼聯新星贊奴沙下個月代表比利時征戰世盃，都唔知幾多人踩佢唔應該入選，適逢今晚比利時喺亨克同盧森堡拍跳，贊奴沙肯定會施展渾身解數，拍住夏薩特同盧卡古攻堅，盧森堡呢鋪仲唔聽炒？讓3球都捧2.05倍「讓主」！

（now632台周二凌晨2:45直播）

比利時陣中猛將如雲，計埋曼城隊長高柏尼、曼聯中場費蘭尼、車路士翼鋒夏薩特同「新魔獸」盧卡古在內，現時嘅24人初步大軍名單足足有12名英超兵，所以唔少人都認為呢支「歐洲紅魔」可以喺南韓、俄羅斯同阿爾及利亞同處嘅世盃F組輕鬆突圍。講到最令人期待嘅比利時決賽周球星，相信非贊奴沙莫屬。
米洛列特有傷難戰盧森堡

呢位曼聯左翼係有潛質，但獲領隊韋莫斯徵召入比利時大軍之後，勁多Fans彈到佢一文不值，國家隊隊友米拿拉斯仲話，贊奴沙冇份踢外圍賽、喺曼聯下半季仲冇埋正選，唔知佢憑乜去巴西喎！今晚贊奴沙預計會擔正，仲唔把握機會證明實力咩！

今場波喺亨克踢，單係禮拜四嘅操練，已經有接近1萬人入場為比利時打氣，預期基斯杜球場今晚會坐爆兩萬人。比利時賽前有唔少阻滯，除咗話國際足協派人去國家隊下榻嘅酒店突擊藥檢、阻住班國腳瞓覺外，利物浦門將米洛列特亦喺前日操練受傷，加埋昨晨先踢完歐聯決賽嘅馬體會門將泰拔高圖爾斯未歸隊，韋莫斯今仗焗用第3門將卡文斯基把關。

幸好仲有高柏尼同尋日宣布會征戰最後一次世盃嘅雲拜頓鎮守防線，睇怕盧森堡連蛋都破唔到。呢隊魚腩嘅世界排名低比利時100位，過去12次同「歐洲紅魔」交手僅錄得3和9負劣績，對上一次作客贏波亦已經係08年9月嘅事，唔似頂得住贊奴沙、夏薩特同盧卡古狂轟猛炸囉！