執安國倫筍嘢 潘頓運都贏埋

猪拉多纳

　　潘頓今季好想做一哥，已經係公開事實，佢目前贏咗82場頭馬，當然未夠數，睇個去勢，今季冇100場W，唔理係人定係神，邊個都幾難做得成騎師冠軍。

　　而潘頓深明此道，現時密密食，得閒起個孖，好手氣嗰日執番三幾場，總之，點都要同雷神保持距離，二人目前相差11場，唔算多，又唔係少，但肯定唔可以輕視對手，因為同佢拗緊手瓜嗰個再唔係韋達，而係神級嘅莫雷拉。

　　6匹坐騎變10匹

　　原本安國倫呢次出馬質量俱備，點知佢突然唔跑，所有坐騎要另覓人選，有幾位騎師執到筍嘢，潘頓係其中1位幸運兒，本來潘頓只係得6匹馬跑，點知安國倫帶挈，依家變為場場有馬跑，10場卜滿晒，呢啲唔係叫做「運」，真係唔知可以叫做咩？！

　　潘頓執咗安國倫4件，餐士較高嘅會係「無敵城堡」、「銳不可擋」和「開心駕到」，加埋佢本身自己原有坐騎，好似「慷慨寶」、「千杯豪情」和「千利多」，好幾件都有贏面。