車路士聯賽再劫紅軍

猪拉多纳

首先要恭喜車路士奪得足總盃，上周六嘅決賽，加上之前喺歐聯淘汰巴塞隆拿嘅表現，車仔真係踢出爭氣波，我睇到都差啲流眼淚。希望5.20歐聯決賽有3D睇，車仔對拜仁戰況又一樣咁動人就好喇！

講真，我之前都有少少睇唔起車仔看守領隊迪馬堤奧，覺得佢執教經驗淺，又唔靚仔！點知戰術運用、同球員關係各方面佢都做得比保亞斯出色，起碼到依家隊長泰利同「老大哥」林伯特等都肯心悅誠服去聽佢支笛，淨係睇上周六捧盃之後，班球員圍住迪馬堤奧拋佢上天，就知佢幾咁得人心啦！

向來簽領隊或球員只好名牌嘅班主阿布，真係要考慮畀張長約迪馬堤奧，佢除咗有料到外，仲好抵用，聽講一個月都係收緊十萬鎊左右，同摩連奴以前份人工真係蚊髀同牛髀，若果一個唔覺意贏埋歐聯冠軍返嚟，我睇阿布你仲有乜藉口唔要人！

車路士歐聯未肯定贏到，英超就一定要繼續搏老命，今晚車仔作客利物浦照撐「藍戰士」（有線200及300台周三凌晨3時直播），因為車仔排第六仲要爭歐聯入場券！上場做後備嘅費蘭度托利斯有機會踢正選，「魔獸」杜奧巴可以休息。可憐「王子」睇見班隊友捧盃慶祝嗰陣冇晒mood，人家開香檳，佢就黑面坐埋一邊玩手機；唔想再被冷落，今晚交出好表現啦！
利物浦主勝率極低

好多利物浦粉絲都鬧爆杜格利殊上周六決賽排陣，唔明點解用比拿美做正選。賽後杜Sir話輸波皆因球員欠經驗！利物浦士氣受損，近期喺聯賽亦抱放棄態度，近四場喺晏菲路得一和三負，連韋根都贏唔到，今季主場勝出率更低於三成，今場點撐得落呀！車路士受讓平半，捧下盤再要埋客勝！