玻利失高原即捧巴拉圭

港陌

04/06/2011


有時買波都要睇吓喺邊度踢！玻利維亞一向靠高原搵食，但聽朝同巴拉圭拍跳選擇喺平原作戰，加上無端端加入一名「僱傭兵」，隨時引發紛爭，咁嘅情況朱楓寧捧1.85倍客W！


巴拉圭巴里奧斯孭飛


玻利維亞一向靠高原搵食，上年世界盃南美洲區外圍賽，就先後喺高原贏阿根廷6:1同巴西2:1。不過朱楓查過，聽朝玻利維亞同巴拉圭拍跳選擇喺聖克魯斯省打，僅高海拔416米，算係平原，對佢哋嚟講其實好不利，更何況玻利維亞今次首度徵召喺巴西出世、効力葡超拿華嘅前鋒保利維亞入伍，無端端有位外人加入，難免會影響球隊嘅默契同士氣。




巴拉圭日前喺熱身賽大敗畀阿根廷B隊2:4，但原來巴拉圭該場都係派B隊上陣，今日作客玻利維亞，會有番多蒙特射手巴里奧斯、布力般前鋒辛達告魯斯同新特蘭中場利華路斯等主力，小勝應該唔難！