夢幻決賽1:1合理

港陌

28/05/2011
文： 黃興桂

夢寐以求嘅歐聯決賽將於周日凌晨上演，由被譽為全球攻力最強、技術最佳嘅巴塞隆拿，出戰全球最多球迷支持嘅曼聯，所以話今場係夢幻決賽絕對不為過。好多人覺得巴塞進攻犀利，又有球王美斯助陣，可以睇高一線，但Peter認為千祈唔好睇小紅魔鬼。


費Sir今季代表作


無可否認曼聯今季演出唔算特別起眼，但勝在穩打穩紮，打入歐聯決賽，亦取得英超冠軍，以紅魔鬼人腳可以獲得如此佳績，可堪稱為領隊費格遜職業生涯代表作。另一邊廂，巴塞教練哥迪奧拿雖然係少壯派，但並冇心浮氣躁，唔會亂講嘢，相當難得，今仗係名副其實勢均力敵之戰，估計入球會較少，Peter認為會開出入球細，好可能會打和一比一，需要加時。




無論賽果係點，Peter最唔想見到球證犯錯，令一方得益捧盃，另一方遺憾收場。近年大賽不時出現球證誤判影響賽果，令人失望及感到可惜，希望今場執法嘅匈牙利籍判官卡錫佢能夠做到盡善盡美，咁就功德無量。




金句：王者頂級終極決戰，望天保佑判官咪錯