愛的呼喚但求穩陣

猪拉多纳

　　今日有兩場盃賽，兩場出馬都唔滿額，去到季尾經常有呢個現象，跑大賽小貓幾隻都試過，啲練馬師唔通嫌錢腥，定係有其他原因？不過，馬會唔應該當冇事發生，大鑼大鼓跑場盃賽，點知出馬唔多，有失熱鬧氣氛。

　　第二場四班1600米。「勁利多」都算何良有恆心，今季大部分時間都係安排隻馬跑1600米，雖然搏到依家都未贏到1場，陣中演出唔係唔好喎，7場之中，有4場跑到入二至四名，起碼唔係時有時冇。

　　睇隻馬上次嘅走勢，追唔切輸馬頸位，只能嘆句冇運。今次再遇「金貴人」，仇人見面，分外眼紅，兩駒磅位及排位唔同咗，復仇好時機。

　　第五場三班1400米。「愛的呼喚」前仗跑到好冇心機，大家有眼見，唔覺得係谷中一哩應付唔到，所以，第時見佢再跑一哩，千祈咪當佢流。

　　講番「愛的呼喚」今次機會，復出跑咗1場，如果再留喺短途，未必係好事，但即刻走去跑一哩，又唔係咁穩陣，方仔轉回1400米，以策萬全，手法正路，而呢匹明星名下馬隔晚票數亦啱數，值得重視。

　　誰可拼夠分量

　　第十場二班1400米。「誰可拼」之前輸過畀「好健康」、贏過「勝飛」，在二班地位高，上次由一級賽回到二班賽，即刻再次入圍，一啲都唔意外，今次繼續跑二班賽，排位好、路程啱，情況與上場相差無幾，唯一考慮係阿輝啲馬用韋達，通常都冇好結果……希望唔好開口中。

    (陳華棟 資深評馬人)