英勇大師變招郁手

猪拉多纳

　　執筆之時有幾陣雨，今晚唔知場地變成點？其實有陣時賭馬撞口卦都可以贏大錢，又有時千算萬算，都係棋差一，真係好睇閣下氣數。所以呢，賭馬都係抱住輕鬆心情，先至玩得長。

　　第三場四班1000米。「創出商機」繼續用雷神，賠率肯定唔會冷，頂多兩倍，如果今晚頭兩場雷神有馬贏，呢匹馬可能得番15蚊，抵唔抵買W，真係見仁見智，阿棟向來格言係過熱寧願放手，但用做馬膽應該幾穩陣，始終內檔且近績唔錯。

　　第四場四班1200米。「英勇大師」初出田草短途力拼入前五名，算係走得ok，而被捧到5倍，有「風聲」邊可能咁熱，但係匹馬仲係幾嫩水，輸得唔遠，質素使然。呢類告東尼馬跑完1場可以有好大進步，仲要整埋個面箍降格轉爭谷草，唔係想盡早交代，邊使變呢樣變樣先？！

　　第六場三班1200米。我都好少會貼吳定強馬，不過，呢匹「準依時」近兩仗走勢真係吸引，唔使問阿貴，實力在三班一定夠贏。呢鋪再用韋達，由上次11檔，變成今次6檔，形勢好得多，冇理由仲要等，同埋，呢場有雷神重飛，晒吳帥胃口。(陳華棟 資深評馬人)