黃蜂又窮又冇火捧唔過

猪拉多纳

識得發窮惡可能仲有得救，窮到連火都冇埋咁就棹忌嘞。好似日乙隊福岡黃蜂咁，窮到預咗要退出職業聯賽，今日仲有乜本事贏鳥取飛翔呀，一於博鳥取受讓平半個1.94倍下盤啦！

（開賽時間：周日下午1:00）

日乙唔少球隊周身債係人都知，但係衰到學似福岡咁連5,000萬日圓（約396萬港元）營運資金都唔夠，又真係唔係咁多。福岡衰到咁貼地，主要係今年有成億日圓赤字，個債務雪球愈滾愈大，要達到今年11月30號之前有5,000萬營運資金都好抆水，搞到要借助旗下嘅小學生比賽，整個「黃蜂Kids伙伴」計劃籌旗，雖然兩日間都執咗200幾萬，不過都唔知幾時先填得滿個氹，佢哋班頭頭都認隨時會畀聯賽會褫奪個日乙認證，落番去地區聯賽重新嚟過，態度好悲觀。
鳥取誓師拚死護級

對手鳥取都唔係乜嘢好嘢，佢哋响日乙包尾，少尾三嘅群馬成6分，真係有錢都未必有得留低。但係佢哋起碼仲有啲火，早幾日就响末廣溫泉嘅白兔會館同埋班Fans一齊誓師，嗌晒口號話要死砌留低，姑勿論佢哋有冇能力實現目標，至少嗰份鬥志就鮮明過愁雲慘霧嘅福岡。

查實呢兩隊波嘅往績都冇乜高低，講近況係一隊8戰1勝，另一隊係8戰不勝，大家一樣咁廢，但係福岡衰到連岡田隆、金森健志、坂田大輔3件都停埋賽，仲憑乜讓人平半呀？