「大象國」超班 踩扁塞內加爾

猪拉多纳

世盃外非洲區最後直路！

世盃外非洲區第3圈首回合今晚揭開戰幔，兩回合計勝方就可以進軍決賽周。當中最有睇頭嘅，當然係科特迪瓦硬撼塞內加爾啦！率先喺主場出擊嘅「大象」，計人腳真係冠絕非洲，前中後3星杜奧巴、耶耶托尼同高路托尼今季都弗到漏油，最重要係領隊林武治賽前向球迷派定心丸，保證會帶領「大象」殺入2014世盃決賽周，首回合面對未踢先驚嘅塞內加爾可秤先，2.25倍「讓主」捧得過。

（開賽時間：周日凌晨1:00）

呢場非洲大戰唔單止戲碼十足，火藥味亦都夠晒濃，雙方上年喺塞內加爾首都達喀爾交手嗰陣，主隊球迷就躁到將石頭同玻璃樽掟落球場，搞到場波腰斬，最終科特迪瓦總比數贏6:2躋身非國盃決賽周。今次兩支非洲雄獅喺科特迪瓦嘅阿比讓再續前緣，菲力斯侯保治波尼球場嘅28,484張波飛尋日已經售罄，警方講明會派遣1,700名警察同憲兵駐守喺球場內外維持秩序。
塞內加爾冇選丹巴巴亞

查實兩回合贏到塞內加爾6:2，都足以證明兩班波嘅實力係有距離，偏偏塞內加爾領隊居里斯仲走去玩對抗，將同佢唔妥嘅車路士前鋒丹巴巴亞拒諸門外，加上馬美迪奧夫受傷落選，單靠柏比斯施斯就想喺科特迪瓦後防搵着數？難啲喎！効力圖盧茲嘅科特迪瓦右閘奧里亞賽前爆料，喺法甲踢波嘅塞內加爾國腳都認為今場波勝算唔高，未開波就扯白旗，鬥心好極有限。
領隊保證可連續3屆入決賽周

查實又唔怪得塞內加爾班國腳咁驚嘅，畢竟「大象」陣營真係星光熠熠，今季喺利物浦重拾狀態嘅高路托尼獲得重召，佢細佬耶耶托尼就繼續喺曼城有高水準演出，前線嘅杜奧巴喺土超同歐聯亦一樣係咁數胡，加埋迪奧迪、沙洛文卡勞同謝雲奴等猛將，老實講塞內加爾真係唔夠鍊喎！領隊林武治賽前透過科特迪瓦足總官網發表咗段勝利宣言，話力爭連續第3次躋身決賽周係全國夢想，但就叫Fans唔使擔心，事關班手足會搏到盡去完成任務，信心爆晒棚，首回合主場出擊斷估唔止贏1粒咁少啩！