皇馬讓唔起利雲特

猪拉多纳

戰鬥力跌Watt是非多

今晚西甲利雲特喺主場迎戰皇家馬德里，有條件偷雞搶分！事關利雲特連續6場未輸過，相反皇馬是非多多，尋日仲爆出巴利上年幾乎加盟巴塞，安察洛堤依家仲未搵到方向，利雲特3.65倍「讓主」好路！

（now632台周日凌晨2:00直播）
巴利被爆上季幾乎投巴塞

利雲特踢法硬淨，今季主場出擊3次只係失咗1球，可見佢哋後防集中力超強，加上佢哋已經6場不敗，信心同士氣逐點逐滴累積起嚟。唔好忘記，上季皇馬作客嚟到亦佔唔到咩甜頭，只係憑小將艾華路莫拉達完場前入波先險勝2:1，主隊想偷雞唔係冇可能囉！

對家皇馬今季賣走奧斯爾，控制能力弱咗，天價簽入嘅加里夫巴利又做埋玻璃人，日前又傷要抖3個星期。西班牙網站Latdp尋日仲爆料，話巴塞上年簽佐迪艾巴前，原來想用6,000萬歐元買巴利，仲同佢經理人會面過2次，但因巴利經理人話佢未準備好出國，想再等2年先走喎！點都好，安察洛堤再唔諗計，成日要C朗單天保至尊，今季聯賽真係凍過水。