雷丁 聖人搶分「大」廝殺

猪拉多纳

英超護級形勢競爭激烈，基本上成個聯賽榜下半部球隊都有降班危機，今晚包尾嘅雷丁會主場迎戰「聖人」修咸頓。雷丁依家墊緊底，但距離護級線不過係差7分，修咸頓亦只比降班區多4分，呢場6分波雙方都無條件失分，以修咸頓嘅強勁鋒力，加上雷丁有勇無謀嘅死衝打法，今場勢必大把入波睇，1.72倍入球大絕對值得捧場。

（有線200、300周六晚7:45直播）
修咸頓近5場作客4開大

雷丁喺英超唔經唔覺已連輸6場，但呢隊波喺主場就有過和車路士、贏愛華頓嘅好戲，最大問題係佢哋無論對勁旅定係弱旅，都鍾意擺大個頭同人鬥攻，近7仗有6場要失2球或以上。季中畀修咸頓炒魷先轉教雷丁嘅艾堅斯，今場倒戈更加唔想衰畀舊東家睇，主場肯定落柯打狂砌客隊，在公在私都無理由唔攻啦！

修咸頓近期連贏利物浦同車路士，不過佢哋對上一次作客贏波已經係1月中，而且近5場作客有4場都開入球大，火力咁猛原因在於一對箭頭積洛迪古斯同列基林拔都係射得之人，列基林拔更加係今季英超入波最多嘅英格蘭球員，連朗尼都唔夠佢入得多，有呢兩支大炮射住，今場想入少球都難啦！
頂占筍盤：雷丁（入球大）