阿仙奴征西搶Ｗ

猪拉多纳

踩行油衝前四

去到季尾，鬥志先係最緊要，阿仙奴恨入前四恨到發燒，今輪英超作客西布朗照贏！兵工廠早前連戰皆北，好彩在歐聯出局前贏番場拜仁，班波即刻生番晒。佢哋嚟緊目標清晰，反而西布朗等收咧冇嘢好爭，主場都頂唔住啦，揀客Ｗ！

（有線300及200台周六晚10時直播）

踢盃賽變數多，可能畀你碌吓一場、碌吓又一場咁過關捧盃，但聯賽漫漫長路，每隊都要經歷狀態高低起伏，最後嘅王者先至係貨真價實。阿仙奴早前再次面對四大皆空嘅殘酷現實，歐聯主場對拜仁完全冇得打，領隊雲格承受空前壓力，對呢支年輕球隊嚟講，的確非常難捱。
西布朗風流波難靠

「阿叔」話「波係圓嘅」，果然係金科玉律，亦係足球好睇同奧妙之處。歐聯作客拜仁，阿仙奴贏2比0，幾乎逆轉晉級，呢場勝仗令兵工廠信心返晒嚟，之後聯賽連贏史雲斯同雷丁，班波精神面貌sharp醒番晒，贏拜仁一場簡直係還魂波，如果阿仙奴本季成功取得下屆歐聯入場券，真係要多得呢場勝仗。

非常時期用非常手段，雲格近仗大膽貶門將施捷斯尼，以及大將華美倫做後備，替補嘅法比安斯基同哥斯尼發揮一流，而且撞啱謝雲奴on fire，就算韋舒亞繼續缺陣、禾確特上陣成疑，作客依然冇有怕。

西布朗本季聘奇勒為帥，依家排緊聯賽第8，可以話係超額完成，依家已經無欲無求。相比阿仙奴為入前四搶錢咁搶，西布朗戰意差得遠，今戰恐成兵工廠炮灰。