史篤城谷唔起 維拉受讓有計

猪拉多纳

輸吓一場、輸吓又一場，史篤城5季來首次面對降班危機壓力爆燈，讓波靠唔住！英超另一場「6分波」護級大戰，史篤城主場鬥阿士東維拉，主隊今年勝率唔夠10%，呢班波守強攻弱好難谷得起，維拉起碼有賓迪基入到波，受讓極筍。

（有線303及203周六晚10時直播）

史篤城於08年升上英超，不嬲毫無星味，但憑硬淨打法同超強防守，一直穩佔聯賽一席，5年來從未試過受到降班威脅。可能係過分坐定粒六，史篤城打完2012年賽事後，好似已覺得攞夠分；踏入2013年不斷Hea踢，14場比賽贏得1場，不經不覺已跌落下游，依家僅離降班區4分。
賓迪基入球保證

危機殺埋身，惟一方法係要開始贏波，但史篤城一向打爛仔波攻力超弱，依家係聯賽中入波最少一隊，場均只入0.87球。以佢哋獨沽一味英式高Q大棍打法，霎時間要強攻搶W有啲難度。相比史篤城突然水浸眼眉，維拉今季長期弱勢，心理上已經習慣，而且射手賓迪基弗到爆，近11場轟入9球，入波有保證下，受讓值捧。