修咸頓未上岸 雷丁拖落水

猪拉多纳

護級6分波大作戰

英超包尾大幡雷丁任命艾堅斯領軍救亡，今晚艾帥喺主場領軍倒戈鬥舊主修咸頓，兩隊合演護級關鍵6分波，恩斷義絕冇情講！「聖人」目前已攀到積分榜第12位，但仍未坐穩船，佢哋幾場勝仗都喺主場出擊，今次作客讓波有啲過火！包尾嘅雷丁形勢危殆，和都唔掂，為咗求生主場必將傾力狂攻，投X首選大盤。

（有線300及200台周六晚7時45分直播）
後防不穩仲要焗攻

艾堅斯2010年接掌修咸頓，帶住班波由英甲殺上英超，冇功都有勞，但「聖人」管理層不念舊情，今年1月搵普捷天奴頂佢個位。艾帥失業兩個多月極速搵到工，上月尾接掌情況危殆嘅雷丁，話咁快就掉轉槍頭決戰修咸頓。艾堅斯上輪首次領軍作客阿仙奴大敗，從陣上表現所見，後防不穩問題並冇改善，計晒聯賽同盃賽雷丁已連輸7場，士氣唔慌好，不過家陣已無退路，主場出擊焗攻。

另一邊廂修咸頓喺普捷天奴帶領下全面升呢，喺主場變身成為強隊剋星，近期先後殺敗曼城、利物浦同車路士，表現完全唔似下游球隊，箭頭積洛迪古斯大爆發，拍住王牌前鋒列基林拔威脅好大。不過「聖人」雖列12位，但僅領先尾3阿士東維拉4分，若想及早上岸仍要攞多幾分，今仗雷丁空群而出，預期會畀到修咸頓有好多反擊機會，若能保持穩定發揮，相信爭取入波唔難。
高空轟炸聖人防線

由於修咸頓近績勁靚，故今場作客都要讓波，但佢哋今季聯賽客場15戰只贏2場，勝出率僅13%，對上9次客場出擊僅1勝，真係信唔過，艾堅斯又咁熟路，必會針對「聖人」後防瘀血凱維特進攻，佢哋最強嗰瓣係高空轟炸，今次將把握死球機會狂轟對手，預期呢場護級大戰會上演入球騷，可捧大盤。