FC江蘇搶W幫主帥賀壽

猪拉多纳

中超球隊FC江蘇今晚喺亞冠盃E組主場對泰超球隊武里南聯，係時候省招牌。雖然江蘇今季表現普通，但今日係教頭奧古卡59歲大壽正日，賽前佢落柯打要贏波燃點出線希望，相信班球員都會識做，贏波送份賀禮畀佢，主勝1.68倍抵玩。

（now671台及中央5台周二晚7:40直播）

上季中超亞軍江蘇開季後得2勝2和2負，亞冠盃首戰以1:5慘負FC首爾，跟手以1:1打和仙台維加泰，今場對武里南聯正係打開分組賽勝利之門最好時機。教練奧古卡賽前話，經已刨熟武里南聯嘅比賽錄像，認為只要有耐性就可以贏波，希望球迷可以忍耐，迎接球會史上首場亞冠盃勝仗，戰意唔需要懷疑。
劉建業復出鬥武里南聯

仲有呀，奧古卡喺記者會話足球除咗贏波外，仲要識得取悅球迷至得，擺明摸清晒武里南聯底細，唔係佢邊會講得咁口響？唔通佢生日攞嚟瘀咩？更何況，上年奧古卡生日前，江蘇曾經以5:0狂勝FC大連賀壽，相信佢哋今場都會踢得特別肉緊，有理由相信江蘇喺教頭帶旺下會踢出代表作。

雖然江蘇首席射手達拿拉捷因為受傷冇註冊，肯定錯過所有分組賽，令到佢哋火力直接受損，不過前鋒阿歷山大祖維迪上場聯賽做後備，抖夠有利今場「騷哥利」，後衞劉建業又話好番可以候命，武里南聯淨係靠新簽嘅希杭中場甘美奧干沙利斯同富山勝利翼鋒平野甲斐，唔多靠得住，作客睇怕要擺低晒3分至得。

亞冠盃E組