球星多人氣勁唔係大晒

猪拉多纳

全球最矚目嘅賽事，梗係歐聯連場大戰啦！呢個4月有成3個禮拜都有歐聯陪住大家，認真係過足波癮。講番今晚8強首回合，巴塞隆拿要作客硬撼法甲豪門巴黎聖日耳門，看似實力不相伯仲，但Peter認為巴塞可以坐和望贏。

首先，聖日耳門係一支金錢堆砌出來的名牌球隊，伊巴謙莫域、柏斯托尼、拿維斯、堤亞高施華等個個都係獨當一面，季中仲有「萬人迷」碧咸來投，隊波人氣火速急升。不過球星多、人氣勁，唔代表隊波一定贏梗，好似英超「暴發戶」曼城咁，咪連續兩屆歐聯分組賽出局，聖日耳門勝在個人質素高之餘，籤運亦唔錯，喺今屆征途只係遇到波圖、華倫西亞等次一班對手，嚟到8強亦屬理所當然。
吸取ＡＣ一役教訓

不過，今晚要硬撼巴塞就唔係咁講嘞！Peter多次強調教頭維蘭路華對巴塞的重要性，而養傷多時的維帥今仗有望復工領軍，大大激起眾將士氣，而且自從用番韋拿之後，美斯喺有咗呢位西班牙前鋒在前面掩護下，得到更多發揮空間，表現如魚得水，何況16強幾經辛苦先至淘汰AC米蘭，令球員明白到歐聯冇弱隊，切忌輕敵，相信有所警惕的巴塞，今仗唔會重蹈覆轍。

Peter認為「地上最強」可坐和望贏。另一場拜仁主場對祖雲達斯，前者雖連場報捷氣勢勁，但有中場悍將查維馬天尼斯停賽，隨時畀「老婦人」悶和，唔好對呢支德國班霸盲目樂觀。
金句：四月天，歐聯夜