一隊押大頭 一隊刀叉足電

猪拉多纳

車仔曼聯 再開「大」片

嚟到復活節假期嘅最後一日，夜晚做咩好？梗係坐喺屋企睇「車曼大戰」啦！今晚車路士會喺足總盃8強重賽大戰曼聯，對於「藍戰士」嚟講保住今季唯一獎盃希望當然重要，但係「紅魔」亦都肯定為完成「雙冠王」美夢搏甩髀，加上兩軍對賽從來都係入球騷保證，一於跟往績捧1.65倍入球大啦！（now632台及廣東體育周一晚7:30直播）
近10次碰頭9次開大

「車曼對決」從來都係英格蘭球壇最強戲碼之一，小妹對於上季尾同今季初喺聯賽嘅「黑哨疑雲」印象當然深刻，今屆英聯盃16強戰至加時最後1分鐘，車仔以5:4獲勝嘅大戰亦都相當經典，小妹覺得唔只因為賽事本身技術水平高，入球多亦都係吸引球迷嘅最大原因，睇番佢哋近10次對賽，有足足9次都喺法定時間內出現至少3個入波，近5次對賽更出現4個或以上「士哥」，絕對係開大嘅信心保證啦！
賓帥 費Sir牙齒印深

除咗往績，兩軍教頭「對壘」亦係今場嘅焦點之一，賓尼迪斯喺執教利物浦嗰陣就已經頻頻同費格遜「舌戰」，嚟到2013年亦不忘公開狠插費Sir經常向球證施壓，費Sir又以拒絕握手，同埋喺英總8強主場對「車仔」時，喺比賽日小冊子嘅「主場領隊專欄」入面反傳統刪去歡迎賓帥嘅字句等「招式」還擊。

家陣賓帥得番呢隻盃可以爭，佢老人家昨晨懶醒半力出擊，最終瘀爆收場以1:2輸畀修咸頓跌出聯賽榜三甲，預期「賓佬」會派番桑馬達、夏薩特同丹巴巴亞呢個攻擊鐵三角擔正挽面子，況且對家費Sir又希望用雙冠王收復上季四大皆空嘅失地，兩邊今仗無論為報仇定為隊波都肯定唔會留手。考慮到車路士一班中場如林柏特、夏薩特等近況大勇，同上仗聯賽以1:0小勝新特蘭場波休戰「儲氣」嘅朗尼及傑斯等攻擊手硬碰，肯定整一場精彩入球騷出嚟，各位球迷千祈唔好錯過呀！
曼聯英總拆慣「車」

‧兩軍過去10次於足總盃對戰，曼聯獲8勝。

‧車路士近6次對賽都贏唔到曼聯，得3和3負。

‧兩軍近6次對戰，有5次開出半場入球大。
紅魔平手坐走望贏

雖然話車路士近6次喺主場迎擊曼聯，有4場都保持不敗，之不過嚟到足總盃，「紅魔鬼」可以話係「藍戰士」嘅剋星，10次對戰中「車仔」居然輸8次，以今季「藍戰士」嘅實力，對住近21場作客賽事僅1敗嘅曼聯，想保不敗都有難度，平手盤可以吼埋客隊。