狼隊發惡搶分咬阿伯

猪拉多纳

周一甚少有成40幾場波咁熱鬧，阿King就收窄範圍，主要集中講下英冠同英甲，其中英冠狼隊依家護級形勢嚴峻，最近已經的起心肝頻頻搶分，季尾波戰意行先，狼隊作客無欲無求嘅伯明翰，必定拚盡冇保留，「讓球客勝」有計。

（周一晚10時開賽）

上季狼隊仍在英超打滾，估唔到今季一降班就潰不成軍，經過易帥震盪後，近期該隊搵來英甲一哥唐卡士打領隊甸恩桑達士執教，的確有番起色，呢位球員時代踢過利物浦及維拉嘅威爾斯前鋒，深知搶分必須要有波入，被迫有前冇後豁出去，因此一眾射手如艾賓斯比歷克、奇雲杜里、施古達臣及巴卡利沙高都被激活，依家排緊尾三，但與第十七位的黑池只差兩分，護級尚未絕望。
伯明翰冇嘢好爭

雖然伯明翰近況唔曳，但要爭前六升班附加賽資格，機會非常渺茫，現階段只係踢風流波，同為護級搏老命嘅狼隊相比，作戰心態實在差天共地，今仗讓路唔奇，狼隊「讓球客勝」咪錯過。至於榜首卡迪夫城直接升班席位已十拿九穩，近期戰意有所鬆懈，面對「守」術了得嘅布力般流浪，隨時受困於對方鐵桶陣，悶鬥悶最好捧細。最後英甲尾三球隊樸茨茅夫有回光返照迹象，近六仗有五場搶到分，食住好勢頭今次主場唔赦燦美爾，直取主勝。