車仔紅魔爆大鑊

猪拉多纳

重賽史丹福橋 今晚只能活一隊

復活節檔期早場上演英格蘭足總盃8強重賽，衞冕的車路士回師史丹福橋主場再戰曼聯，今仗賽和將加時，加時再和就會互射12碼，故兩支英超班霸今晚只能活一隊，晉級後將硬撼曼城。車路士非常高度重視足總盃，上場聯賽留晒力部署喺今仗搏殺，主場出擊一定唔會做縮頭烏龜。「紅魔鬼」主帥費格遜勁憎車仔教頭賓尼迪斯，定必寸步不讓。兩軍今季3次碰頭合共炮製15個士哥，玩大盤最穩陣！
聯賽留力為搏呢場

車路士面對魔鬼賽程，9日內要連打4場硬仗，單睇上場對修咸頓排陣已知佢哋嘅目標鮮明，擺明採半放棄態度留力搏呢場足總盃重賽。最終佢哋不敵「聖人」，大軍嚟緊周中要應付歐霸盃，但教頭賓尼迪斯明言今場足總盃非常重要，實會打真軍同對手死過。射手丹巴巴亞喺歐霸盃不符合上陣資格，今戰將擔正攻堅，相信效果會好過用王子費蘭度托利斯多多聲，若能踢番上次作客奧脫福尾段瘋冚喪攻嘅氣勢，「紅魔鬼」後防有排騰。

曼聯同樣要喺3日內應付兩場賽事，主帥費格遜事先張揚會玩輪換，佢哋勝在後備力量強大，上場對新特蘭抖完嘅朗尼同查維亞靴南迪斯有望喺前線拍住上，後者速度飛快，把握力高，而且對車仔演出特佳，將成對手後防心腹大患。「紅魔鬼」基本上穩奪英超錦標，但紅魔自04年奪冠後已經好耐未再染指過足總盃錦標，因此老費今年好恨贏埋足總盃做雙料冠軍，佢同賓帥關係極曳，上次碰頭直頭當「肥賓」隱形唔同對方握手，今次會落柯打要班兵加多兩錢肉緊，希望可踢走車仔，等賓帥孭鑊。
近10對碰9次開大

曼聯上賽喺主場領先兩球大好形勢下被逼和，有點放虎歸山嘅味道，佢哋最近兩場聯賽hea住踢贏一球即收工，無非都係儲埋啲力喺呢場大戰搏殺，佢哋近8次對車路士5勝3和，戰績一面倒佔上風，莊家開緊平手盤，正路應捧「紅魔鬼」，但車仔始終擁有夏薩特同桑馬達等高質兵，癲起上嚟唔係人咁品。翻查往績，雙方近10次碰頭9場開大，對上7次交手更開全大，今季聯賽3戰最少入波嗰場都有4球交收，今場簡簡單單要大盤，求分頭可博埋總入球四、五。
「小豌豆」係車仔殺手

老費唔放「車仔殺手」查維亞靴南迪斯！曼聯墨西哥射手查維亞靴南迪斯今季淪為後備，但仍保持「車仔殺手」本色，聯賽連盃賽3次對車路士都有士哥，近7次砌「車」入咗6球，成為對手頭號剋星。「小豌豆」早前代表完國家隊勁攰上仗冇落場，但主帥費格遜表明今仗會用佢。
老費：佢係非賣品

曼聯今季簽埋尹佩斯後，隊內前線有人滿之患，令查維亞靴南迪斯上陣時間唔多，近期傳出西甲馬德里雙雄馬體會同皇馬都想斟佢，連意甲班霸祖雲達斯亦對佢好有興趣。

不過，費爵爺已經閂定後門，向各界表明「小豌豆」係非賣品：「佢同球會簽咗份長約，我一定唔會放人o架！」與此同時，費爵爺已決定留用老將里奧費迪南，將會開出1年新約，而費Sir更希望佢退出國家隊，全心全意為球會効力。