馬體會天羅地網捉蝙蝠

猪拉多纳

今晚西甲馬德里體育會坐鎮主場迎戰華倫西亞。馬體會早前陷入小低潮，聯賽二哥位置隨即畀同市嘅皇馬搶番，幸好上場聯賽已經重回勝軌，目前同皇馬只係相差1分，今晚大有機會藉主場之利擊退「蝙蝠兵團」華倫西亞，全取3分，簡簡單單直取1.55倍主勝。

（now632台周一凌晨3:00直播）
華倫西亞作客戰績曳

成日聽到人講，做人冇目標同條鹹魚冇分別，呢句說話去到季尾大把球隊用得着，好似馬體會咁，下屆歐聯入場券基本上已經到手，聯賽冠軍唔到佢爭，剩低嘅西甲賽事可以話係正正式式嘅風流波。不過教練施蒙尼大可以畀個目標班波，依家聯賽落後皇馬1分，要從後趕上絕對唔難，只要令班球員重燃爭勝心就可以，始終皇馬係同市一哥，如果可以喺聯賽騎住呢支「銀河艦隊」都算係一大成就。而且佢哋今季主場戰績強勁，14戰錄得13勝，僅次於榜首巴塞隆拿，只要發揮正常，要擊敗今季狀態飄忽嘅華倫西亞，唔係一件難事。

華倫西亞啱啱喺歐聯16強行人止步，可以專注番本土賽事。佢哋現時喺聯賽排第5，同第4嘅皇家蘇斯達相差2分，要爭最後一張歐聯入場券，往後嘅比賽就要打醒十二分精神。可惜，華倫近況麻麻，近3場作客未贏過，加上今季聯賽作客只係贏過4場咁大把，咁嘅數據去到作客馬體會，情況真係唔多樂觀。唯一值得安慰係前鋒莊拿斯干卡維斯腳風唔錯，近幾場全部有貨交，不過蘇爾達杜扭傷足踝缺陣，得番干卡維斯目標咁大，今晚實畀馬體會派人專門招呼，所以馬體會主勝實屬穩陣之選。