紅軍求反彈喪攻維拉

猪拉多纳

輸波知衰例必玩大佢

做人最緊要知醜，上仗輸咗唔緊要，今場就要喪攻入波！英超利物浦作客阿士東維拉，紅軍剛不敵修咸頓認真冇面，但佢哋本季聯賽輸波後例必反彈，近6次敗陣後翌仗全勝，仲一共轟入23球，除番開場均幾乎入4球。加上維拉賓迪基亦係勁弗，兩隊對攻入球唔會少，捧大盤！

（有線300及200台周日晚8時30分直播）
哨牙蘇博攞神射手

作為多年死忠「利粉」，利物浦攞唔攞到盃、入唔入到前4、翌季有冇得踢歐戰都唔緊要，拿仁只望班球員攞番個心出嚟比賽，力戰而敗冇所謂，懶懶閒hea踢等完場就最唔要得。本季於羅渣士帶領下，紅軍後防係曳咗；但毫無疑問打番出悅目嘅攻擊足球，最緊要係有番鬥志，基本上場場都搏盡，呢點令拿仁老懷安慰。

睇番聯賽戰績，紅軍本季之前8次輸波，翌仗6勝2和；近6次更取得全勝。喺上仗輸波刺激下，利物浦跟手就會大爆發，曾經兩次大炒諾域治5比2同5比0，分贈史雲斯、富咸、昆士柏流浪5蛋、4蛋同3蛋，該6仗中，有5次利物浦單計自己嘅入球數已夠開大，認真得人驚。依家紅軍再唔使兼顧其他賽事，專心一意打餘下聯賽，蘇亞雷斯、史杜列治、菲臘比古天奴會繼續瘋狂爭取入波，其中當然以「哨牙蘇」最肉緊，目前佢仍以22球領先射手榜，梗係希望入多幾粒，季尾攞個射手獎威威啦！
賓迪基弗爆拉唔住

踏入2013年，利物浦共踢14場比賽，開大比率高達8成6，其實阿士東維拉，今年同樣有86%開大率！呢班波季尾為護級大打爭氣波，頻頻主動出擊喪攻搶分，近兩場分別擊敗雷丁同QPR兩大護級對手，成班波士氣返晒嚟。其中射手賓迪基，近10場轟入8球弗爆，主場唔赦紅軍。

睇番首循環對碰，維拉於晏菲路打出有效反擊足球，賓迪基梅開二度，最終客勝3比1，睇嚟今場紅軍無論出丹尼爾艾格、加歷查或者史卡迪爾，都嘜唔住呢位比利時射手，兩隊都係入得又失得，1.62倍大盤有買趁手。