多蒙特史特加再演入球騷

猪拉多纳

「和其他」呢個波膽一直都好少出現，所以每次開得出呢個「和其他」嘅賽事大家都會印象深刻，阿仙奴迷就一定記得前季作客紐卡素出現過4比4，而曼聯上季主場惡鬥愛華頓亦係4比4，德甲方面上季亦出現過「和其他」，大家有冇印象呢？答案就係上季多蒙特主場對史特加，嗰場直頭好睇過戲，今周德甲呢兩隊又對碰，馬會開出大盤賠率低至1.6倍，我認為大依然值博。

今輪到史特加主場，佢哋嘅歐霸旅程早前已經畀拉素終結，所以依家會專注聯賽爭取高啲排名。國際賽前嗰周聯賽作客贏法蘭克福2比1，表現不過不失，當中首席射手伊比斯域射入12碼，球隊今季靠佢入波，佢嘅表現好壞自然係勝負關鍵。另左閘摩連拿路停賽，改由波卡負責鎮守左路，另外基斯特受傷對中場防守或會有多少影響。
兩隊後防都唔穩陣

選擇投X大而唔買客勝甚至上盤原因有二，一來係多蒙特要備戰下周中作客馬拉加嘅歐聯大戰，二係巴拉斯塞高斯基及型男中堅曉姆斯要養傷，中堅配搭上會係蘇保迪加菲臘比辛坦拿，後者係防線上最大憂患，恐怕入埋都唔夠佢失，領隊高普都畀咗好多機會呢位巴西中堅，但個人認為佢真係冇進步過！

另外今季回歸既前隊長紐尼沙軒亦在預計陣容內，上輪對弗賴堡中佢梅開二度又有助攻，可見佢為爭回正選一席真係好搏命，今晚大家記得留意佢嘅表現！總括兩隊後防都唔多穩，玩入球大啱哂！

（有線61台周六晚10時30分直播）