黑貓甩鬚難逃魔爪

猪拉多纳

「黑貓」斷爪甩鬚，撞正紅魔鬼，只能乖乖送上3分。英超新特蘭主場迎戰曼聯，神射手史提芬費查同隊長卡達莫分別因傷缺陣，戰鬥力曳上加曳；曼聯就算有足總盃後顧，但仍可輕易捉貓，客W仲有1.5倍有買趁早。

（有線300及200台周六晚8時45分直播）

新特蘭一向畀人硬淨感覺，就算實力一般，但都充滿鬥志，勁旅要贏佢哋都唔易。但「黑貓」今季周時有神冇氣，領隊奧尼爾未能將生氣注入球隊，主力如施巴斯坦拿臣、施斯隆嚴重跌Watt，占士麥堅恩、阿當莊臣又冇貨交，本季一直依靠射手史提芬費查支撐大局，但呢名蘇格蘭前鋒因傷唔出得，中場硬漢卡達莫亦同樣倦勤；今仗前線無論出域咸定丹尼格拉咸，難聽講句都係嘥氣。
曼聯近8對賽7開「贏贏」

於英超時代，曼聯一向恰慣新特蘭，聯賽23次對賽，只輸過1次畀「黑貓」。紅魔鬼近況勇銳，近6場英超全勝，近5仗更保冇失波，今戰相信可繼續淨勝對手。雖然2日後就要於足總盃大戰車路士，但就算費格遜收起部分主力，派查維亞靴南迪斯、路爾斯安達臣等二線兵上陣，一樣可輕取對手。今仗除吼1.5倍熱W，「客客」亦可（目及）實，事關近8次曼聯贏新特蘭，有7場都開「贏贏」。