雲達華治派牌仲醒神 荷蘭1.78倍「讓主」走唔甩

猪拉多纳

冇史奈達？冇問題！喺世盃歐洲區D組外圍賽5戰全勝嘅荷蘭，今晚鬥羅馬尼亞前有史奈達因傷退隊，但亨格比利認為由雲達華治做Keyman效果反而更好，今鋪對住「星」光黯淡嘅羅馬尼亞，1.78倍「讓主」睇怕走唔甩！

（無綫翡翠台周三凌晨3:30直播）
羅馬尼亞仲用緊梅度

分組賽5戰全勝勁入16球，美中不足係上場贏愛沙尼亞3:0場波有史奈達打柴，賽後證實鼠蹊受傷焗住退隊，領隊尹戈爾已經補選咗阿爾克馬爾新星阿當馬希作替補。可能好多人都擔心冇咗史奈達嘅荷蘭，攻擊力會唔會削弱，但有睇上場波嘅球迷都知，自從雲達華治入替史奈達之後，荷蘭成個中前場都生晒，亦正正係靠雲達華治打破僵局，「橙衣兵團」先至風冚咁攻到愛沙尼亞甩轆。

對家羅馬尼亞仲要為小組次名而戰，作客都肯定唔踢得進取，之不過佢哋上場造訪被罰閉門作賽嘅匈牙利都處下風，幾經辛苦先臨尾2:2逼和對手，戰鬥力去到邊大家心照。大軍以布格勒斯特星隊球員做骨幹，偏偏個領隊比度卡唔識用24歲嘅星隊前鋒魯爾洛斯古，反而重用過晒氣嘅梅度數胡，呢班波出到歐洲極其量只係二線尾貨色，「星」光黯淡嘅羅馬尼亞憑咩同荷蘭鍊先？

歐洲區D組