德國顯實力「薩」無赦 返主場演「派蛋續集」

猪拉多纳

德國幾日前喺世盃外歐洲區C組作客哈薩克，憑住近8成控球率同逾20次攻門，最終輕描淡寫以3蛋大炒對手，今晚返番自己地頭上演「派蛋續集」，領隊勒夫為咗展示強國真正實力，實會叫班波盡情蹂躪小國哈薩克，就算盤口辣到讓3球，都照捧1.56倍「讓主」！

（now633台周三凌晨3:45直播）
多蒙特進攻組合信得過

德國主帥勒夫前排接受專訪，話希望FIFA（國際足協）考慮整多圈預賽畀哈薩克同法羅群島呢啲魚腩，等啲強國唔使山長水遠咁辛苦，不過上場贏得嗰三球邊似強國o架，相信勒夫為咗增強「說服力」，顯示強弱懸殊差距有幾大，肯定會落柯打盡炒，起碼要好似奧地利怒炒法羅群島6蛋咁樣先收貨！

雖然德國中場舒韋恩史迪加坐波監，達斯拿仲因為腦震盪退埋隊，不過佢哋嘅進攻只會更流暢！事關頂替「小豬」嘅根度簡，實力絕唔差得過前者之餘，活力更加贏晒，相信成功搶佔正選只係時間問題。再者，馬高列奧斯停賽復出、施雲賓達補選入伍，配合埋馬里奧葛斯，根本就係默契爆燈嘅多蒙特進攻配搭，入波真係執豆咁執。

歐洲區C組