4年前輸1:6冇晒面 美斯復仇戰阿根廷贏「玻」

猪拉多纳

「美斯復仇戰」今晚上演！4年前，阿根廷作客玻利維亞慘遭大炒1:6，令「球王」慘遭全球嘲笑一踢國家隊就走晒樣，今晚同一賽程再次於世盃外圍賽嘅南美洲賽事上演，以隊長身份領軍嘅美斯當然要克服高原氣候報一箭之仇，有力開出1.65倍客勝。

（開賽時間：周三凌晨4:00）
玻利維亞高原氣候「失靈」

美斯賽前講起2009年嗰場慘敗都猶有餘悸，佢話嗰度嘅比賽場地緯度高達3,600米，高原氣候令佢喺比賽嗰陣呼吸困難，又好難判斷個波嘅來勢。不過撇除地利，主隊根本唔算強，唔止喺上仗畀哥倫比亞喪炒5蛋，早前喺自己地頭面對智利及哥倫比亞亦輸波，近年實力大躍進、喺世盃外圍賽10戰得1負嘅阿根廷，照計有力克服惡劣環境贏波。

美斯78次為成年國家隊上陣已經取得32個入球及23次助攻，只差2個「士哥」就追平馬納當拿嘅國家隊入球紀錄，有呢位「4屆金球王」在陣，加埋迪馬利亞刑滿復出，肯定令攻擊力更上一層樓，何況佢哋仲出動埋「泡沫艙」畀班國腳提前適應高原氣候，阿根廷絕對有力全取3分保持領先優勢。